F'dan l-istudju ta' każ dwar il-liġi tal-familja – il- kura u kustodja tat-tfal, l-Istati Membru ġew mitluba javżaw lir-rikorrent dwar l-ispejjeż tal-litigazzjoni fil-każijiet li ġejjin: Każ A – Sitwazzjoni nazzjonali: Tnejn min-nies jgħixu flimkien għal numru ta' snin mingħajr ma jiżżewġu. Meta jiddeċiedu li jisseparaw ikollhom tifel/tifla ta' tliet snin. Il-qorti tiddeċiedi illi tagħti l-kura u kustodja tat-tifel/tifla lill-omm u dritt ta' aċċess lill-missier. L-omm tiftaħ kawża biex tillimita d-dritt ta' aċċess tal-missier. Każ B – Sitwazzjoni transnazzjonali meta int avukat fl-Istat Membru A: Tnejn min-nies jgħixu flimkien għal numru ta' snin fi Stat Membru (Stat Membru B) mingħajr ma jiżżewġu. Ikollhom tarbija iżda jisseparaw minnufih wara t-twelid tagħha. Il-qorti fl-Istat Membru B tagħti l-kura u kustodja tat-tarbija lill-omm u dritt ta' aċċess lill-missier. L-omm u t-tarbija jmorru jgħixu fi Stat Membru ieħor (Stat Membru A) kif ġew awtorizzati jagħmlu mid-deċiżjoni tal-Qorti u l-missier jibqa' fl-Istat Membru B. Xi snin wara, l-omm tiftaħ kawża fl-Istat Membru A biex tbiddel id-dritt ta' aċċess tal-missier.