F'dan l-istudju ta' każ fuq il-liġi tal-familja – il-manteniment, l-Istati Membri ġew mitluba javżaw lir-rikorrent bl-ispejjeż tal-litigazzjoni fil-każijiet li ġejjin: Każ A – Sitwazzjoni nazzjonali: Tnejn min-nies jgħixu flimkien għal numru ta' snin mingħajr ma jiżżewġu. Meta jisseparaw ikollhom tifel/tifla ta' tliet snin. Il-qorti tiddeċiedi li tagħti l-kura u kustodja lill-omm. L-uniku punt li jibqa' huwa l-ammont ta' manteniment li jrid jingħata lill-omm mill-missier għall-edukazzjoni u l-għajxien tat-tifel/tifla. L-omm tiftaħ kawża l-qorti fuq din il-kwistjoni. Każ B – Sitwazzjoni transnazzjonali fejn inti avukat fl-Istat Membru A: Żewġ persuni jgħixu flimkien għal numru ta' snin mingħajr ma jiżżewġu fi Stat Membru (l-Istat Membru B). Il-koppja jkollha tifel/tifla ta' tliet snin. Huma jisseparaw. Il-qorti fl-Istat Membru B tiddeċiedi li tagħti l-kura u kustodja lill-omm. Bi ftehim mal-missier, l-omm u t-tifel/tifla jmorru jgħixu fi Stat Membru ieħor (l-Istat Membru A) fejn jistabbilixxu r-residenza tagħhom. Tibqa' pendenti kwistjoni waħda. Din tikkonċerna l-ammont ta' manteniment dovut lill-omm mill-missier għall-edukazzjoni u l-għajxien tat-tifel/tifla. L-omm tiftaħ kawża l-qorti fuq din il-kwistjoni fl-Istat Membru A.