Taħriġ inizjali tal-imħallfin u tal-prosekuturi fl-Unjoni Ewropea

Deskrizzjoni ġenerali

Fir-Repubblika Ċeka, it-taħriġ inizjali huwa pprovdut mill-Akkademija Ġudizzjarja Ċeka.

L-Akkademja Ġudizzjarja tipprovdi taħriġ inizjali għall-apprendisti, jiġifieri apprendisti ġudizzjarji (imħallfin futuri) u apprendisti legali (prosekuturi futuri), u, aktar riċentement, kandidati ġudizzjarji (imħallfin futuri).

L-apprendisti ġudizzjarji u legali jagħmlu servizz preparatorju ta’ 3 snin li matulu jipprattikaw f’qorti/uffiċċju tal-prosekutur tal-istat u jieħdu sehem f´avvenimenti ta’ taħriġ organizzati mill-Akkademja Ġudizzjarja u mill-qrati/uffiċċji tal-prosekutur tal-istat. L-emenda tal-Att dwar il-qrati u l-imħallfin (Nru 6/2002 Sb.) neħħiet il-kariga ta’ apprendist ġudizzjarju b’effett mill-1 ta’ Jannar 2022. L-apprendisti ġudizzjarji li ġew ammessi għas-servizz preparatorju qabel din id-data jlestu s-servizz preparatorju tagħhom f’konformità mal-pjan tas-servizz preparatorju eżistenti.

L-emenda msemmija aktar ’il fuq introduċiet il-kariga ġdida ta’ kandidat ġudizzjarju. Kandidat ġudizzjarju jagħmel kors ta’ taħriġ li jdum sena. L-iskop tiegħu huwa li jħejji lill-kandidat ġudizzjarju għall-kariga ta’ mħallef bl-aħjar mod possibbli. Dan huwa żgurat kemm bil-ħidma f’diversi dipartimenti tal-qrati tal-prim’istanza kif ukoll fil-qrati tal-appell u permezz tal-attendenza għal avvenimenti ta’ taħriġ tal-Akkademja Ġudizzjarja, li primarjament jieħdu l-forma ta’ seminars prattiċi. L-attendenza għal ċerti seminars tal-Akkademja Ġudizzjarja hija obbligatorja għall-kandidati ġudizzjarji. L-ewwel proċessi tal-għażla għall-kandidati ġudizzjarji għaddejjin bħalissa f’ċerti qrati. Nantiċipaw li fl-2022 se jkun hemm madwar 30 kandidat ġudizzjarju fir-Repubblika Ċeka fi tmiem dan l-ewwel stadju tal-proċess tal-għażla. Fil-ħarifa tal-2022 se jsiru proċessi tal-għażla ulterjuri. Fl-1 ta’ Jannar 2022, se jkun hemm 74 apprendist legali.

Il-qafas legali għat-taħriġ inizjali tal-kandidati ġudizzjarji muri fl-Att Nru 6/2022 tal-Ġabra, dwar il-Qrati, l-Imħallfin, l-Imħallfin Onorarji u l-Amministrazzjoni tal-Qrati, kif emendat (https://www.zakonyprolidi.cz/cs/2002-6) u fir-Regolament Nru 516/20021 tal-Ġabra, dwar l-għażla, il-prattika u l-eżami tal-kandidati ġudizzjarji, kif emendat (https://www.zakonyprolidi.cz/cs/2021-516); Il-qafas legali għat-taħriġ inizjali tal-apprendisti legali muri fl-Att Nru 283/1993 tal-Ġabra, dwar l-Uffiċċju tal-Prosekutur Pubbliku, kif emendat (https://www.zakonyprolidi.cz/cs/1993-283) u fir-Regolament Nru 383/2017 Coll., dwar l-għażla, il-prattika u l-eżami tal-apprendisti legali.

Aċċess għat-taħriġ inizjali

Il-proċess tal-għażla għall-ammissjoni fis-Servizz Preparatorju għall-Apprendisti Legali jitħabbar mill-Prosekutur Pubbliku Reġjonali f’konsultazzjoni mal-Ministeru għall-Ġustizzja, meta jkun hemm bżonn li jimtlew pożizzjonijiet vakanti ta’ apprendisti legali. apprendist legali jeħtieġlu jissodisfa r-rekwiżiti li ġejjin: ċittadinanza tar-Repubblika Ċeka, kapaċità ġuridika sħiħa, karattru tajjeb u lawrja universitarja Ċeka fil-liġi. Il-proċess tal-għażla jinkludi test bil-miktub, intervista u eżami psikoloġiku. Test bil-miktub u intervista jintużaw sabiex jiġu vverifikati l-għarfien professjonali u l-aptitudni tal-applikant għall-ammissjoni fis-servizz preparatorju. Huwa prerekwiżit li wieħed jgħaddi mit-test bil-miktub sabiex javvanza għall-parti orali tal-proċess tal-għażla. Ir-riżultat tal-intervista jiġi sottomess mill-kumitat tal-eżamijiet lill-Prosekutur Pubbliku Reġjonali, li jaċċetta lill-kandidat li jgħaddi għal servizz preparatorju ta’ 3 snin.

Il-proċess tal-għażla għall-ammissjoni għas-servizz preparatorju tal-kandidati ġudizzjarji jitħabbar mill-President tal-Qorti Reġjonali skont meta jkun hemm bżonn li jimtlew pożizzjonijiet vakanti ta’ kandidati ġudizzjarji. Ir-rekwiżiti għal kandidat ġudizzjarju huma: ċittadinanza tar-Repubblika Ċeka, lawrja universitarja fil-liġi minn università fir-Repubblika Ċeka, eżami ġudizzjarju professjonali (jew eżami professjonali komparabbli), kapaċità ġuridika u karattru tajjeb, l-esperjenza u l-kwalitajiet morali tal-persuna jridu jagħtu garanzija li hija se taqdi dmirijietha fil-kariga kif suppost, is-suċċess fil-proċess tal-għażla għal kandidat ġudizzjarju, u ġurament quddiem il-President tal-Qorti Reġjonali. Il-proċess tal-għażla jikkonsisti f’parti bil-miktub, eżami psikoloġiku u intervista. Il-parti bil-miktub tinkludi studji tal-każ ta’ livell bażiku ta’ diffikultà fid-dritt ċivili, fid-dritt kriminali, fid-dritt amministrattiv u fid-dritt dwar l-insolvenza, kif ukoll mistoqsijiet li jittestjaw ir-raġunament loġiku. Il-parti bil-miktub tal-proċess tal-għażla hija pprovduta u organizzata mill-Akkademja Ġudizzjarja. Huwa prerekwiżit li wieħed jgħaddi mit-test bil-miktub sabiex javvanza għall-parti orali tal-proċess tal-għażla. Kandidat li javvanza għall-parti orali tal-proċess tal-għażla jrid isirlu eżami psikoloġiku qabel ma jiġi ammess għall-parti orali tal-proċess tal-għażla. Ir-riżultat tal-eżami psikoloġiku jkun wieħed mid-dokumenti sottomessi lill-kumitat tal-għażla. Il-membri tal-kumitat tal-għażla jagħmlu mistoqsijiet dwar il-parti bil-miktub tal-proċess tal-għażla, kif ukoll mistoqsijiet dwar l-għarfien professjonali u l-kwalitajiet personali tal-kandidat. Kull membru tal-kumitat jagħti marka lill-kandidat bejn 0 u 10 punti. Jiġu kkunsidrati d-dokumenti kollha disponibbli għall-bord tal-għażla, ir-riżultati tal-parti bil-miktub miktuba mill-kandidat, ir-riżultati tal-eżami psikoloġiku tiegħu u t-tweġibiet tal-kandidat fil-parti orali tal-proċess tal-għażla, inklużi l-preżentazzjoni u l-espressjoni ġenerali tiegħu. Ir-riżultati tal-proċess tal-għażla għall-kariga ta’ kandidat ġudizzjarju jiġu ppubblikati mill-President tal-Qorti Reġjonali f’forma psewdonomizzata fuq is-sit web tal-Qorti.

Format u kontenut tat-taħriġ inizjali

It-taħriġ inizjali tal-apprendisti legali jdum 3 snin. Matul dan iż-żmien, jistgħu jattendu l-korsijiet ta’ taħriġ offruti mill-Akkademja Ġudizzjarja, li huma mfasslin speċifikament għal dan il-grupp fil-mira.

Dawn jinkludu seminars dwar l-applikazzjoni tad-dritt sostantiv u proċedurali, korsijiet ta’ adattament, workshops u webinars. L-apprendisti legali għandhom ukoll aċċess għal medda ta’ materjali ta’ apprendiment mill-bogħod, korsijiet permezz ta’ vidjo, metodoloġiji jew reġistrazzjonijiet ta’ lezzjonijiet fil-forma ta’ kotba awdjo. Il-kors ta’ adattament, li huwa obbligatorju, isir fl-ewwel 6 xhur mit-taħriġ inizjali. L-għan tiegħu huwa li jiffamiljarizza lill-apprendisti legali reklutati ġodda mal-kontenut tas-servizz preparatorju u mal-leġiżlazzjoni bażika li tirregola x-xogħol tas-servizz tal-prosekuzzjoni. Fost l-attivitajiet ta’ taħriġ offruti lil dan il-grupp fil-mira hemm proċessi fittizji, seminar iffokat fuq taħriġ prattiku fis-sentenzjar, seminars regolari ffokati fuq l-emendi għal-leġiżlazzjoni kriminali, u korsijiet preparatorji finali għall-eżami professjonali finali. Kull apprendist legali jkollu ħarrieġ fl-uffiċċju tal-prosekutur, li jissorvelja l-livell tas-servizz preparatorju minn perspettiva professjonali u pedagoġika. Il-ħarrieġ jiggwida wkoll lill-apprendisti fl-apprendiment tal-prinċipji tal-etika professjonali. Il-ħarrieġ jinħatar u jitneħħa mill-prosekutur legali u jintgħażel minn fost l-aktar prosekuturi ta’ esperjenza.

Kandidat ġudizzjarju huwa obbligat jattendi seminars speċifiċi matul it-taħriġ inizjali ta’ sena. Fost dawk obbligatorji hemm seminar li jintroduċi lill-kandidati ġudizzjarji l-ġodda għall-ġudikatura u għall-kunċetti bażiċi tal-etika professjonali. Sussegwentement, il-kandidat ġudizzjarju jeħtieġlu jattendi seminar prattiku interattiv fuq 5 ijiem dwar il-proċedura ċivili intitolat “Proċedimenti mid-dikjarazzjoni tat-talba sas-sentenza”, li jiffoka fuq il-proċedimenti ċivili li jsiru fil-qorti ċivili tal-prim’istanza. Barra minn hekk, il-kandidat ġudizzjarju jkun meħtieġ jattendi seminar interattiv dwar il-proċedura kriminali intitolat “Proċedimenti mill-att tal-akkuża sas-sentenza”, li jiffoka fuq il-proċess proċedurali f’qorti kriminali tal-prim’istanza. Imbagħad, il-kandidat ġudizzjarju jkun obbligat jattendi seduta fittizja waħda, jiġifieri “Seduta Fittizja tad-Dritt Ċivili” jew “Seduta Fittizja tad-Dritt Kriminali”. Dawn is-seduti fittizji jseħħu f'qorti fittizja u huma bbażati fuq ir-rwol attiv tal-parteċipanti. Minbarra s-seminars obbligatorji, il-kandidati ġudizzjarji jistgħu jattendu seminars mhux obbligatorji. Dawn is-seminars jiffokaw fuq ir-rappreżentanza fl-awla tal-qorti, il-kunċetti bażiċi tar-retorika u tal-komunikazzjoni effettiva, il-ħiliet tal-kitba, u suġġerimenti prattiċi dwar l-użu tas-sistemi ta’ informazzjoni legali ewlenin. Is-seminars “Ġustizzja Amministrattiva” jservi bħala tħejjija għall-imħallfin amministrattivi futuri. Għalihom hemm disponibbli wkoll numru ta’ materjali ta’ studju tal-apprendiment elettroniku, ta’ linji gwida metodoloġiċi u ta’ vidjos ta’ taħriġ. Jistgħu jieħdu sehem ukoll f’avvenimenti ta’ taħriġ oħrajn li huma offruti mill-Akkademja Ġudizzjarja u mfasslin għal gruppi fil-mira oħrajn.

Kandidat ġudizzjarju jkollu wkoll ħarrieġa matul is-servizz preparatorju tiegħu fil-qorti li jissorveljaw il-livell tas-servizz preparatorju minn perspettiva professjonali u pedagoġika. Kandidat ġudizzjarju jkollu ħarrieġ f’kull wieħed mid-dipartimenti ġudizzjarji li jaħdem fihom. Il-ħarrieġa jkunu mħallfin maħturin u mneħħijin mill-President tal-Qorti Reġjonali. Il-ħarrieġa jfasslu wkoll evalwazzjoni tal-prestazzjoni tal-kandidat ġudizzjarju f’dak id-dipartiment.

Terminazzjoni tat-taħriġ inizjali u tal-proċess ta’ kwalifika

Is-servizz preparatorju inizjali ta’ apprendist legali jdum 3 snin. Wara li jlesti s-servizz preparatorju ta’ 3 snin, l-apprendist legali jagħmel eżami finali. Jikkonsisti f’test bil-miktub u f’intervista quddiem kumitat tal-għażla. Fil-parti bil-miktub tal-eżami finali, l-apprendist legali jabbozza att tal-akkuża, deċiżjoni jew mozzjoni oħra f’kawża kriminali jew mozzjoni f’kawża ċivili li fiha l-prosekutur pubbliku jkun awtorizzat jaġixxi, u appell kontra d-deċiżjoni tal-qrati tal-prim’istanza. Il-parti orali tal-eżami finali tittestja l-għarfien tal-kandidat dwar

1. id-dritt kostituzzjonali,
2. id-dritt ċivili sostantiv u proċedurali,
3. id-dritt tax-xogħol u d-dritt tas-sigurtà soċjali,
4. id-dritt tal-familja,
5. id-dritt kriminali sostantiv u proċedurali,
6. id-dritt kummerċjali,
7. il-ġustizzja amministrattiva u d-dritt amministrattiv sostantiv u proċedurali,
8. id-dritt finanzjarju,
9. id-dritt notarili u l-Kodiċi ta’ Eżekuzzjoni,
10. ir-regoli ta’ proċedura tal-qrati u tal-prosekuturi pubbliċi, ir-regoli interni u tal-uffiċċju tagħhom u l-organizzazzjoni tal-qrati u tal-prosekuturi pubbliċi.

Jinkisbu wkoll għarfien bażiku tad-dritt tal-Unjoni Ewropea u orjentazzjoni dwar is-sorsi bażiċi tad-dritt internazzjonali. Tqis ukoll l-orjentazzjoni ġenerali tal-applikant fl-ordinament ġuridiku u r-regoli ta’ proċedura tal-uffiċċju tal-prosekutur pubbliku, il-ħila tal-applikant li japplika u jinterpreta b’mod korrett dispożizzjonijiet legali u l-espressjoni verbali tiegħu. Ir-riżultat tal-eżami finali jingħata klassifikazzjoni bħal kandidat “kwalifikat b’eċċellenza”, “kwalifikat” u “mhux kwalifikat”. Il-kandidat li jirnexxi jirċievi ċertifikat ta’ tlestija mill-Ministeru għall-Ġustizzja. Is-suċċess fl-eżami finali huwa prerekwiżit għall-prestazzjoni sussegwenti tal-uffiċċju tal-prosekutur pubbliku. Il-kundizzjonijiet għat-twettiq tal-kariga ta’ prosekutur jinkludu: ċittadinanza tar-Repubblika Ċeka:, kapaċità ġuridika, karattru tajjeb, età ta’ mill-inqas 25 sena, lawrja universitarja fil-liġi minn università fir-Repubblika Ċeka, suċċess fl-eżami finali, il-kwalitajiet morali tiegħu jagħtu garanzija li se jwettaq dmirijietu kif suppost, u jaqbel mal-ħatra tiegħu bħala prosekutur u mal-assenjazzjoni tiegħu għal uffiċċju tal-prosekutur partikolari. Prosekutur pubbliku jinħatar mill-Ministru għall-Ġustizzja għal perjodu bla limitu ta’ żmien fuq il-proposta tal-Prosekutur Pubbliku Suprem.

It-taħriġ ta’ kandidat ġudizzjarju jdum sena. Fi tmiem dan il-perjodu, kandidat ġudizzjarju jista’ japplika għal proċess tal-għażla għall-kariga ta’ mħallef, li titħabbar mill-Ministru għall-Ġustizzja. Mhux biss il-kandidati ġudizzjarji, iżda anki persuni oħrajn jistgħu japplikaw għall-proċess tal-għażla għall-kariga ta’ mħallef. Pereżempju, persuni li kellhom il-kariga ta’ prosekutur pubbliku, avukat, nutar, uffiċjal ġudizzjarju u mħallef tal-Qorti Kostituzzjonali għal 5 snin, kif ukoll persuni li ilhom jaħdmu fi prattika legali jew f'attivitajiet xjentifiċi jew ta’ tagħlim għal 10 snin f’qasam legali b’rabta mal-attivitajiet tat-teħid ta’ deċiżjonijiet tal-qrati. Il-proċess tal-għażla jikkonsisti f’parti bil-miktub u f’parti orali. Il-parti bil-miktub tal-proċess tal-għażla hija organizzata mill-Akkademja Ġudizzjarja u tinkludi studji tal-każ ta’ livell ogħla ta’ diffikultà fid-dritt ċivili, fid-dritt kriminali, fid-dritt amministrattiv, fid-dritt dwar l-insolvenza u fid-dritt kostituzzjonali. L-eżami bil-miktub jivverifika l-għarfien professjonali u l-aptitudni tal-kandidat għall-kariga ta’ mħallef. Kandidat li jirnexxi fit-test bil-miktub u javvanza għall-parti orali jsirlu eżami psikoloġiku qabel ma jiġi ammess għall-parti orali tal-proċess tal-għażla (jekk ma jkunx diġà għamlu fil-proċess tal-għażla għall-kariga ta’ kandidat ġudizzjarju). Il-parti orali tal-proċess tal-għażla għall-kariga ta’ mħallef tieħu l-forma ta’ intervista. Il-kumitat tal-għażla għandu ħames membri (imħallfin u esperti mill-Ministeru għall-Ġustizzja). Matul l-intervista, il-membri tal-kumitat tal-għażla jagħmlu mistoqsijiet iffokati fuq il-parti bil-miktub tal-proċess tal-għażla, kif ukoll mistoqsijiet iffokati fuq l-aspett professjonali tat-twettiq tad-dmirijiet ta’ mħallef u fuq il-kwalifiki personali tal-kandidat. Kull membru tal-kumitat tal-għażla jagħti marka lill-kandidat fuq skala minn 0 sa 10, filwaqt li jiġu kkunsidrati d-dokumenti disponibbli għall-bord tal-għażla, ir-riżultati tal-parti bil-miktub miktuba mill-kandidat, ir-riżultati tal-eżami psikoloġiku tiegħu u t-tweġibiet tal-kandidat fil-parti orali tal-proċess tal-għażla, inklużi l-imġiba u l-espressjoni ġenerali tiegħu. In-numru ta’ punti mogħtijin jiddetermina s-suċċess jew il-falliment ta’ kandidat fil-proċedura tal-għażla. Is-suċċess fil-proċess tal-għażla għall-imħallfin huwa prerekwiżit għall-prestazzjoni possibbli tal-funzjoni ġudizzjarja. Meta jinħatar, kandidat jeħtieġ li jkollu tal-anqas 30 sena. Imħallef jinħatar għall-kariga mill-President tar-Repubblika.