Tipi ta’ professjonijiet legali

Prosekuturi

Organizzazzjoni

Is-servizz tal-Prosekuzzjoni Pubblika (Openbaar Ministerie, jew OM) huwa organizzazzjoni nazzjonali b’uffiċċji fir-reġjuni kollha. Hemm ukoll Uffiċċju tal-Prosekutur Pubbliku nazzjonali li jiffoka fuq il-ġlieda kontra l-kriminalità organizzata (internazzjonali), u Uffiċċju tal-Prosekutur Pubbliku Funzjonali għall-ġlieda kontra l-kriminalità u l-frodi ambjentali u finanzjarji.

Hemm 10 uffiċċji tal-prosekuturi distrettwali, fejn il-prosekuturi pubbliċi, megħjuna minn esperti amministrattivi u legali, jimmaniġġaw mijiet ta’ eluf ta’ każijiet kull sena. Jekk jitressaq appell, il-kawża tiġi riferuta lil wieħed mill-erba’ uffiċċji tal-prosekuturi reġjonali. Ir-rappreżentant tal-OM f’dawn l-uffiċċji jissejjaħ l-avukat ġenerali jew Advocaat-Generaal. Il-Kapijiet prosekuturi pubbliċi u l-kapijiet avukati ġenerali jieħdu ħsieb dawn l-uffiċċji. Fil-livell nazzjonali l-OM huwa mmexxi mill-Bord tal-Prosekuturi Ġenerali (College van Procureurs-generaal) f’The Hague. Ir-responsabbiltà politika għall-OM hija fdata f’idejn il-Ministru għall-Ġustizzja. Flimkien mal-Bord tal-Prosekuturi Ġenerali, il-Ministru jiddeċiedi dwar il-prijoritajiet għall-investigazzjoni u l-prosekuzzjoni.

Rwol u kompiti

Kull min ikun issuspettat li wettaq reat kriminali jkollu jittratta l-OM. L-OM huwa l-uniku korp fin-Netherlands li jista’ jtella’ persuna ssuspettata l-qorti. Huwa jiżgura li r-reati kriminali jiġu investigati u li ssir il-prosekuzzjoni.

Huwa jaħdem f’kollaborazzjoni mal-pulizija u servizzi oħra ta’ investigazzjoni. Il-Prosekutur pubbliku huwa responsabbli mill-investigazzjonijiet. L-OM jissorvelja wkoll l-eżekuzzjoni xierqa tad-deċiżjonijiet tal-qorti; il-multi jridu jitħallsu, sentenzi ta’ priġunerija jiġu skontati, u s-servizz komunitarju jitwettaq. Flimkien mal-imħallfin, l-Uffiċċju tal-Prosekutur Pubbliku huwa parti mill-ġudikatura. Għaldaqstant, l-OM mhuwiex Ministeru kif nafuh ġeneralment.

Imħallfin

Organizzazzjoni

Kull min jixtieq isir imħallef irid ikollu bosta snin ta’ esperjenza professjonali. Iktar informazzjoni dwar ir-rekwiżiti hija disponibbli hawnhekk. L-esperjenza professjonali tista’ tinkiseb permezz ta’ kors ta’ taħriġ intern mal-ġudikatura jew xi mkien ieħor fis-sistema ġudizzjarja. Il-ġudikatura tipprovdi t-taħriġ meħtieġ.

L-imħallfin jinħatru mill-Kuruna, taħt il-patroċinju tal-Ministru għall-Ġustizzja u s-Sigurtà. Iċ-ċittadini Netherlandiżi biss jistgħu jinħatru fil-kariga ta’ mħallef. Il-kandidati jrid ikollhom lawrja fil-liġi minn università Netherlandiża.

L-individwi jistgħu jiġu nnominati għal ħatra fil-ġudikatura biss wara rakkomandazzjoni ta’ kumitat ta’ selezzjoni nazzjonali magħmul minn membri mid-diversi qrati, mis-Servizz tal-Prosekutur Pubbliku u minn individwi soċjalment attivi.

Imħallef jinħatar biex jamministra l-ġustizzja f’qorti speċifika. Tali ħatra tista’ sseħħ biss jekk il-qorti inkwistjoni tinnomina lill-imħallef prospettiv. Dawn il-kundizzjonijiet jagħmlu s-sistema ta’ ħatriet kemm jista’ jkun oġġettiva.

L-imħallef huwa uffiċjal tal-gvern bi status speċjali. Wara l-ħatra, l-imħallef ma jistax jaċċetta kariga xi mkien ieħor. L-imħallfin jistgħu jibqgħu fil-kariga tagħhom sakemm jagħlqu 70 sena. Qabel dan, jistgħu jitneħħew mill-kariga kontra r-rieda tagħhom biss mill-ogħla qorti fin-Netherlands, il-Qorti Suprema tan-Netherlands (Hoge Raad der Nederlanden), fuq talba tal-prosekutur ġenerali (procureur-general) ta’ din il-qorti.

Rwol u kompiti

Il-kompitu tal-imħallef huwa li jieħu deċiżjoni imparzjali fit-tilwim legali — inklużi l-kawżi li l-gvern ikun parti fihom. Biex tkun iggarantita l-imparzjalità fil-konfront tal-gvern, tintuża sistema speċjali ta’ selezzjoni u ta’ ħatra. B’hekk, l-istatus legali tal-imħallfin huwa differenti minn dak tal-uffiċjali l-oħra tal-gvern.

Il-Kostituzzjoni Netherlandiża teżiġi li l-imħallfin jieħdu deċiżjonijiet dwar it-tilwim, u tinkludi dispożizzjonjiet li jirregolaw l-istatus legali tal-membri tal-ġudikatura.

L-imħallfin jistgħu jisimgħu l-kawżi skont id-diskrezzjoni tagħhom, filwaqt li jkunu ggwidati mil-leġiżlazzjoni prevalenti. Huma jiddeterminaw ukoll, sa ċertu punt, il-progress prattiku tal-proċedimenti (pereżempju, it-tul ta’ ċerti partijiet tal-proċedimenti).

Hemm diversi dispożizzjonijiet statutorji li jirregolaw l-imġiba tal-imħallfin. Il-fini tagħhom huwa li jiggarantixxu li l-imħallfin jagħmlu xogħolhom b’mod imparzjali. Jekk parti fi proċediment ikollha xi dubji dwar l-imparzjalità tal-imħallef, il-liġi tipprovdi lil dik il-parti b’opportunità biex toġġezzjona li l-imħallef jisma’ l-kawża. Xi drabi, parti waħda f’kawża ma tkunx sodisfatta bil-ħidma tal-imħallef. Hawnhekk issir distinzjoni bejn id-deċiżjoni mogħtija mill-qorti u l-imġiba tal-imħallef.

1. Jekk in-nuqqas ta’ sodisfazzjon ikun minħabba s-sentenza, il-parti li qed tilmenta ġeneralment ikollha l-possibbiltà li tressaq appell;
2. L-ilmenti dwar l-imġiba ta’ mħallef jistgħu jitressqu quddiem il-bord tal-qorti fejn jipprattika l-imħallef inkwistjoni. Kull qorti għandha proċedura għall-ilmenti li tistipula r-regoli biex jiġu ttrattati l-ilmenti.

L-imħallfin iridu jiksbu għarfien espert f’mill-inqas żewġ oqsma. Normalment jisimgħu kawża f’ċertu qasam tal-liġi, imbagħad jaqilbu għal ieħor. Din ir-regola hija mfassla biex l-imħallfin ma jitħallewx jiffokaw għal wisq żmien u żżejjed fuq qasam wieħed ta’ għarfien espert.

L-imħallfin jaħdmu fi qrati distrettwali (rechtbanken). Dawn ikopru mill-inqas erba’ setturi: is-settur tal-liġi ċivili, is-settur tal-liġi kriminali, is-settur tal-liġi amministrattiva u s-settur tal-qorti subdistrettwali. L-imħallfin li jaħdmu fis-settur tal-aħħar jissejħu kantonrechter, l-oħrajn jissejħu rechter. L-imħallfin li jaħdmu fil-qrati tal-appell u fil-Qorti Surpema jissejħu raadsheer.

Il-kompożizzjoni tal-qrati meta jisimgħu l-kawżi hija kif ġej:

• L-imħallfin fis-settur tal-qorti subdistrettwali jisimgħu l-każijiet weħidhom.
• L-imħallfin tal-qrati distrettwali ġeneralment jisimgħu l-kawżi weħidhom, imma wħud mill-kawżi jridu jinstemgħu minn bord ta’ tliet imħallfin.
• L-imħallfin fil-qrati tal-appell jisimgħu l-kawżi f’bord ta’ tlieta, ħlief meta kawża ta’ din x-xorta tkun tista’ tinstema’ minn imħallef wieħed. Ir-regoli għal dan huma stabbiliti fl-Att (l-Att dwar l-Organizzazzjoni Ġudizzjarja).
• Fil-Qorti Suprema, kull kawża tinstema’ minn ħames imħallfin.

Il-Kunsill għall-Ġudikatura huwa responsabbli għar-regolamentazzjoni tal-professjoni.

Bażi ta’ data legali

Għal aktar informazzjoni, ara s-sit web ġenerali dwar il-ġudikatura Netherlandiża, li huwa aċċessibbli għall-pubbliku ġenerali.

Organizzazzjoni tal-professjonijiet legali

Ġuristi

In-Nederlandse Orde van Advocaten (l-Assoċjazzjoni tal-Avukati) hija l-organizzazzjoni professjonali rregolata mid-dritt pubbliku tal-avukati kollha fil-Pajjiżi l-Baxxi.

Skont l-Att dwar l-Avukati, l-avukati kollha rreġistrati fil-Kamra Inferjuri flimkien jiffurmaw l-Assoċjazzjoni. Bħalissa hemm aktar minn 18.000 avukat irreġistrat.

L-assoċjazzjoni tippromwovi, fl-interess tal-amministrazzjoni tajba tal-ġustizzja, l-eżerċizzju tajjeb tal-prattika tal-avukati. Hija tagħmel dan, inter alia, billi tistabbilixxi regoli għall-professjoni legali (abbażi tal-Artikolu 28 tal-Advocatenwet). L-assoċjazzjoni tiżgura wkoll it-taħriġ professjonali tal-avukati (skont l-Artikolu 9 tal-Avucatenwet) u tikkontribwixxi għall-kwalità u s-superviżjoni tal-professjoni legali. Barra minn hekk, l-Assoċjazzjoni tagħti pariri lill-awtoritajiet Olandiżi, meta mitluba u mhux mitluba, dwar pjanijiet ta’ politika u abbozzi ta’ leġiżlazzjoni.

L-assoċjazzjoni għandha tkun distinta mill-assoċjazzjonijiet tal-avukati lokali fid-distretti. Dawn l-organizzazzjonijiet separati għandhom il-kompiti, ir-rwoli u s-setgħat tagħhom stess.

Il-konsulenti Ġuridiċi

Ma hemm l-ebda korp ċentralizzat li jirregola din il-professjoni.

Nutara

Organizzazzjoni

L-assoċjazzjoni Rjali Netherlandiża tan-Nutara tal-Liġi Ċivili (Koninklijke Notariële Beroepsorganisatie) tiddefendi l-interessi tan-nutara fin-Netherlands u tiżgura li jkunu jistgħu jagħmlu xogħolhom kif suppost.

Rwol u kompiti

Il-liġi teħtieġ strument notarili għal għadd ta’ ftehimiet u ta’ tranżazzjonijiet legali. L-iktar importanti huma:

1. It-trasport ta’ proprjetà immobbli fil-Pajjiżi l-Baxxi;
2. Il-ħolqien jew il-kanċellazzjoni tal-ipoteki;
3. L-inkorporazzjoni tal-kumpaniji pubbliċi jew privati b’responsabbiltà limitata (NVs u BVs) jew l-emendi tal-istatut ta’ assoċjazzjoni tagħhom;
4. It-twaqqif ta’ fondazzjonijiet jew ta’ assoċjazzjonijiet (inklużi l-kooperattivi) jew l-emendi fil-kostituzzjoni tagħhom;
5. It-tfassil, l-emendi għat-testmenti u l-eżekuzzjoni tagħhom;
6. It-tfassil jew l-emendi għall-kuntratti taż-żwieġ u għall-ftehimiet ta’ sħubija domestika rreġistrata;
7. It-trasferiment ta’ ishma reġistrati; u
8. Il-provvista ta’ rigali u ta’ donazzjonijiet fi strument notarili.

Nutar jista’ jkun involut ukoll bħala espert legali indipendenti sabiex jilħaq ftehimiet legalment vinkolanti bejn il-persuni. Eżempji jinkludu ftehimiet ta’ kooperazzjoni (sħubijiet kummerċjali, soċjetajiet u soċjetajiet limitati), ftehimiet bejn koabitanti u arranġamenti għall-protezzjoni ta’ soċjetajiet b’responsabbiltà limitata minn partijiet terzi.

Professjonijiet legali oħra

L-organizzazzjoni Professjonali Rjali tal-Uffiċjali Ġudizzjarji fin-Netherlands (Koninklijke Beroepsorganisatie van Gerechtsdeurwaarders, KBvG) hija rregolata mill-Att dwar l-Uffiċjali Ġudizzjarji (Gerechtsdeurwaarderswet). Dan l-Att jagħti lill-KBvG — li l-uffiċjali ġudizzjarji kollha fin-Netherlands iridu jissieħbu fiha — il-kompitu li trawwem prattika tajba fi ħdan il-professjoni.

L-uffiċjali ġudizzjarji Netherlandiżi huma responsabbli li jirċievu u jittrażmettu dokumenti f’konformità mar-Regolament tal-UE Nru 1393/2007 tal-Parlament Ewropew u tal-Kunsill tat-13 ta’ Novembru 2007 dwar in-notifika fl-Istati Membri ta’ dokumenti ġudizzjarji u extra-ġudizzjarji fi kwistjonijiet ċivili jew kummerċjali. Id-dokumenti li għandhom jiġu servuti fin-Netherlands iridu jintbagħtu direttament lil wieħed mill-uffiċjali ġudizzjarji tagħha. It-talbiet għan-notifika jridu jiġu ppreżentati bil-Ġermaniż jew bl-Ingliż. It-talbiet ma jistgħux jintbagħtu lill-korp ċentrali Netherlandiż, l-Organizzazzjoni Professjonali Rjali ta’ Uffiċjali Ġudizzjarji fin-Netherlands. L-għajnuna tiegħu tista’ tintalab biss fiċ-ċirkostanzi eċċezzjonali ddefiniti fl-Artikolu 3(c) tar-Regolament tal-UE msemmi iktar’ il fuq.

Servizzi legali pro bono

Għal konsulenza legali primarja, tista’ titlob l-għajnuna f’waħda mill-Help Desks Legali (Het Juridisch Loket). Hawnhekk tista’ titlob informazzjoni, pariri u kjarifika dwar kwistjonijiet legali. Dan huwa l-ewwel post fejn il-konsumatur għandu jmur biex jingħata għajnuna legali.

Jekk ikun meħtieġ, inti tintbagħat għand avukat jew medjatur privat, u dan ikun it-tieni post fejn tingħata għajnuna legali.

Is-servizzi ta’ informazzjoni kollha fid-Dipartimenti tas-Servizzi Legali huma mingħajr ħlas. Dawn jingħataw jew fuq il-post jew bħala parti minn konsultazzjoni. Tista’ tikkuntattja lil dawn l-Uffiċċji bi problemi li jikkonċernaw il-liġi ċivili, amministrattiva, kriminali u tal-immigrazzjoni.

Ġew stabbiliti total ta’ 44 Help Desks Legali. Dawn jitqassmu b’mod ugwali madwar in-Netherlands sabiex kull ċittadin Olandiż ikun jista’ jintlaħaq faċilment mis-servizzi legali.

Għal aktar informazzjoni, ara s-sit web tal-Help Desks Legali.

Links relatati

Il-Ministeru Pubbliku

Il-ġudikatura Netherlandiża u l-Qorti Suprema tan-Netherlands

L-assoċjazzjoni tal-Avukati tan-Netherlands

Organizzazzjoni Professjonali tan-Nutara Rjali

Organizzazzjoni Professjonali Rjali tal-Uffiċjali Ġudizzjarji

L-Help Desk Legali