X’inhu l-proċess biex jintalbu d-danni mingħand it-trasgressur? (pereżempju kawża fil-qorti, kawża ċivili, proċedura ta’ adeżjoni)
Bħala regola, il-kumpens għandu jintalab fi proċedimenti kriminali. Għal dan l-għan, trid tinforma lill-awtoritajiet tal-pulizija kriminali jew lis-Servizz tal-Prosekutur Pubbliku, sa tmiem l-istadju tal-investigazzjoni, li tixtieq tressaq talba għal kumpens, li tista’ tagħmel, pereżempju, meta tipprovdi d-dikjarazzjoni tiegħek. Meta tirċievi avviż tal-akkużi miġjuba kontra l-persuna akkużata, imbagħad ikollok 20 jum biex tippreżenta t-talba.
NOTA: It-talbiet ċivili għal kumpens mhumiex soġġetti għal formalitajiet speċifiċi u, fejn jintalab inqas minn EUR 5 000, inti tista’ tippreżenta t-talba inti stess.
Il-Qorti ordnat lit-trażgressur iħallasni d-danni/kumpens. Kif nista’ niżgura li t-trażgressur iħallas?
Meta l-awtur tar-reat ma jħallasx volontarjament il-kumpens li jkun ġie ordnat iħallas, ikollok tagħmel rikors għal ordni ta’ eżekuzzjoni, jiġifieri, titlob lill-qorti tintervjeni - tissekwestra il-proprjetà, il-kontijiet bankarji, il-vetturi jew assi oħra - sabiex tiżgura l-ħlas tal-kumpens.
Jekk it-trasgressur ma jħallasx, l-Istat jista’ jħallasni bil-quddiem? Taħt liema kundizzjonijiet?
Iva, fil-każ ta’ reat vjolenti li kkawża tfixkil sinifikanti fl-istandard tal-għajxien u fil-kwalità tal-ħajja tiegħek u t-trasgressur ma jistax iħallas il-kumpens.
Jien intitolat għal kumpens mill-Istat?
Iva, meta t-trasgressur ma jkunx jista’ jħallas tali kumpens u inti vittma ta’ reat vjolenti, u dment li dan ikun ikkawża tfixkil sinifikanti fl-istandard tal-għajxien u fil-kwalità tal-ħajja tiegħek.
Dawn li ġejjin huma intitolati għal kumpens mill-Istat:
- vittmi ta’ offiża gravi fuq il-persuna (jiġifieri li tikkawża diżabbiltà permanenti, diżabbiltà totali temporanja għal mill-inqas 30 jum, jew mewt) direttament bħala riżultat ta’ att ta’ vjolenza;
- fil-każ tal-mewt tal-vittma, il-persuni li l-liġi tagħtihom id-dritt għall-manteniment, bħat-tfal, u dawk li jgħixu f’koabitazzjoni mal-vittma;
- persuni li għenu lill-vittma jew ikkooperaw mal-awtoritajiet fil-prevenzjoni tar-reat jew fis-sejba jew fl-arrest tat-trasgressur, fir-rigward tad-danni li ġarrbu b’riżultat ta’ dan.
NOTA: f’każijiet ta’ reati sesswali, diżabbiltà totali permanenti jew temporanja għal mill-inqas 30 jum tista’ ma tkunx rekwiżit. Din l-eċċezzjoni hija ġġustifikata mill-fatt li, għalkemm dan it-tip ta’ reat, bħala regola, ma jikkawżax inkapaċità għax-xogħol għal mill-inqas 30 jum, il-kumpens għadu ġustifikat minħabba s-serjetà tar-reat.
It-talba għall-kumpens tista’ tiġi ppreżentata sa mhux aktar tard minn sena mid-data tar-reat jew, fil-każ ta’ proċedimenti kriminali, sa mhux aktar tard minn sena wara d-deċiżjoni finali fil-proċedimenti. Il-vittmi li kienu minorenni fiż-żmien tar-reat jistgħu jressqu talba għal kumpens sa sena wara li jkunu laħqu l-età maġġuri.
Jenħtieġ li t-talbiet jiġu ppreżentati bl-użu tal-formola online disponibbli fuq is-sit web tal-Kummissjoni għall-Protezzjoni tal-Vittmi tal-Kriminalità (Comissão de Proteção de Vítimas de Crime).
It-tressiq ta’ talba għal kumpens huwa mingħajr ħlas.
Jien intitolat għal kumpens jekk it-trasgressur ma jiġix ikkundannat?
Eċċezzjonalment, fejn ikun involut reat serju (ara hawn fuq) u fejn it-trasgressur ma jkunx magħruf.
Meta t-trasgressur ikun ġie pproċessat u lliberat, bħala regola, m’intix intitolat għal kumpens.
Jien intitolat għal ħlas ta’ emerġenza waqt li nkun qed nistenna d-deċiżjoni dwar it-talba għall-kumpens tiegħi?
Jekk inti vittma ta’ vjolenza domestika int intitolat(a) li tirċievi benefiċċji fi flus mill-istat kull meta, bħala konsegwenza tar-reat, inti tkun fi bżonn finanzjarju serju.
Jenħtieġ li l-applikazzjonijiet għal ħlas ta’ emerġenza jiġu ppreżentati permezz tal-formola online disponibbli fuq is-sit web tal-Kummissjoni għall-Protezzjoni tal-Vittmi tal-Kriminalità.
Trid tinkludi kopja tal-ilment jew tar-rapport ippreżentat lill-awtorità tal-pulizija mal-applikazzjoni. L-applikazzjoni trid tiġi ppreżentata fi żmien sena mid-data tar-reat.