Gruppi fil-mira
L-ERA taħdem mal-prattikanti kollha tal-liġi:
- Imħallfin, prosekuturi u impjegati tal-qorti
- Avukati tas-settur privat, nutara u konsulenti interni
- Uffiċjali tal-infurzar tal-liġi u avukati fl-amministrazzjoni pubblika.
Tipi ta’ attivitajiet ta’ taħriġ żviluppati
L-ERA toffri konferenzi u korsijiet f’livelli differenti fiċ-ċentru tagħha fi Trier (viċin il-kapitali ġudizzjarja tal-UE fil-Lussemburgu), madwar l-Ewropa u online:
- Konferenzi annwali għar-rieżami tal-aħħar żviluppi u d-dibattitu dwarhom
- Seminars li fihom il-prattikanti jesploraw fid-dettall żviluppi speċifiċi
- Korsijiet ta’ taħriġ bażiku bħala introduzzjoni għal qasam speċifiku tad-dritt tal-UE
- Korsijiet fil-lingwaġġ legali.
Dawn l-eventi jseħħu wiċċ imb wiċċ, online jew f’format ibridu.
L-ERA tipprovdi wkoll:
- korsijiet u riżorsi ta’ apprendiment mill-bogħod
- Preżentazzjonijiet mill-bogħod mill-aqwa esperti fid-dritt tal-UE
- Ġurnal legali ta’ kull 3 xhur bl-isem ERA Forum.
Il-programmi ta’ taħriġ tal-ERA jkopru l-firxa sħiħa ta’ liġijiet tal-UE:
- Il-liġi pubblika Ewropea, eż. il-liġi istituzzjonali, id-drittijiet fundamentali, l-ażil u l-immigrazzjoni, il-liġi dwar l-ambjent, it-taxxa
- Id-dritt privat Ewropew, eż. il-protezzjoni tal-konsumatur, il-liġi tax-xogħol u dik soċjali, id-dritt internazzjonali privat, il-kooperazzjoni ġudizzjarja f’materji ċivili
- Il-liġi kummerċjali Ewropea, eż. id-dritt tal-kompetizzjoni, l-akkwist pubbliku, id-drittijiet tal-proprjetà intellettwali, id-dritt tal-kumpaniji, ir-regolamentazzjoni bankarja u finanzjarja
- Id-dritt kriminali Ewropew, eż. il-kooperazzjoni ġudizzjarja f’materji kriminali, il-kooperazzjoni tal-pulizija, iċ-ċiberkriminalità, id-difiża u d-drittijiet tal-vittmi.
Attivitajiet fl-2021
Fl-2021 l-ERA organizzat 209 avveniment ta’ taħriġ li għalihom attendew 9010 prattikant legali minn 86 pajjiż u territorju. Offriet ukoll katalgu ta’ 630 preżentazzjoni mill-bogħod u għadd ta’ korsijiet ta’ apprendiment mill-bogħod u għodod online.
Il-parteċipanti kienu ġejjin minn sfondi professjonali ta’:
- Imħallfin: 12 %
- Prosekuturi: 10 %
- Persunal tal-qorti: 12 %
- Avukati li jipprattikaw għal rashom: 17 %
- Konsulenti interni: 4 %
- Uffiċjali tal-infurzar tal-liġi: 5 %
- Uffiċjali tal-UE: 10 %
- Uffiċjali tal-ministeri: 6 %
- Impjegati oħrajn taċ-ċivil: 7 %
- Akkademiċi: 6 %
- Rappreżentanti ta’ fondazzjonijiet/NGOs: 3 %
- Oħrajn: 7 %
(It-total ma jammontax għal 100 % minħabba l-ittondjar)
Sħubiji/ftehimiet internazzjonali
L-ERA, li hija membru fundatur tan-Network Ewropew tat-Taħriġ Ġudizzjarju (EJTN), ġiet eletta mill-ġdid fl-2022 bħala membru tal-Kumitat tat-Tmexxija tal-EJTN minbarra li tlaqqa’ l-Grupp ta’ Ħidma tan-Network dwar il-Programmi. Għandha wkoll relazzjonijiet tajbin ħafna mal-istituzzjonijiet nazzjonali tat-taħriġ ġudizzjarju, li ma’ ħafna minnhom għandha ftehimiet qafas għall-organizzazzjoni konġunta ta’ attivitajiet ta’ taħriġ għall-imħallfin u l-prosekuturi.
L-ERA hija wkoll sħab regolari mal-Kunsill tal-Għaqdiet Ewropej tal-Avukati (CCBE), ma’ assoċjazzjonijiet tal-avukati Ewropej bħall-Assoċjazzjoni tal-Avukatura Kriminali Ewropea, l-Assoċjazzjoni Ewropea tal-Avukati tal-Impjieg u l-Assoċjazzjoni Ewropea tal-Avukati Żgħażagħ, kif ukoll ma’ aktar minn 20 Kamra tal-Avukati nazzjonali madwar l-Ewropa.
Storja
L-ERA ġiet imwaqqfa fl-1992 fuq inizjattiva tal-Parlament Ewropew. Il-patruni fundaturi kienu l-Gran Dukat tal-Lussemburgu, il-Land ta’ Rheinland-Pfalz, il-Belt ta’ Trier u l-Assoċjazzjoni tal-Ħbieb tal-ERA. Fis-snin suċċessivi, l-Istati Membri kollha tal-UE ingħaqdu mal-fondazzjoni.
Ara filmat dwar l-oriġini tal-ERA hawnhekk: https://www.youtube.com/watch?v=DpNLUgYYAmU
Dettalji ta’ kuntatt
L-Akkademja tal-Liġi Ewropea (ERA)
Metzer Allee
D-54295 Trier – Il-Ġermanja
Tel.: +49 651 93737-0
Posta elettronika: info@era.int
Numru ta’ impjegati: 72
Status legali: L-ERA hija fondazzjoni pubblika mingħajr skop ta’ qligħ.