Deskrizzjoni ġenerali
Huwa offrut taħriġ inizjali, u jekk iva, huwa obbligatorju?
Iva, perjodu ta’ taħriġ prattiku ta’ 3 snin fejn it-trainee jaħdem taħt avukat kwalifikat (“Advokat” Daniż). Matul dan il-perjodu ta’ taħriġ prattiku, it-trainee jrid jattendi korsijiet, jagħmel eżami bil-miktub u eżami (prattiku) fil-litigazzjoni. Il-perjodu ta’ taħriġ prattiku, il-korsijiet u l-eżamijiet huma obbligatorji.
It-taħriġ inizjali jiddistingwi bejn kategoriji ta’ trainees, eż. għal ġuristi interni u avukati?
Ma jiddistingwix bejniethom. Huwa l-istess taħriġ inizjali għall-avukati futuri kollha (madankollu, ara wkoll il-mistoqsijiet, “Hemm rotot ta’ aċċess alternattivi għat-taħriġ?” u “X’inhuma t-tul u l-perjodi ta’ żmien tat-taħriġ?” hawn taħt).
Liema entitajiet huma responsabbli għall-organizzazzjoni tat-taħriġ inizjali?
L-Għaqda Daniża tal-Avukati (amministrazzjoni ta’ korsijiet u eżamijiet).
Prattiki u ditti legali privati (perjodu ta’ taħriġ prattiku).
X’inhi l-bażi statutorja għat-taħriġ inizjali?
L-Att dwar l-Amministrazzjoni tal-Ġustizzja – il-Kapitolu 12
L-Ordni Ministerjali nru 1473 dwar it-taħriġ obbligatorju bħala rekwiżit biex wieħed jiġi ammess għall-prattika tal-liġi
Aċċess għat-taħriġ inizjali
Hemm kundizzjonijiet għall-aċċess għat-taħriġ?
Baċellerat Daniż fil-liġi u lawrja ta’ Master Daniża fil-liġi.
X’inhi l-proċedura ewlenija ta’ reklutaġġ? Jekk hija kompetittiva - min imexxiha?
L-Għaqda Daniża tal-Avukati (korsijiet u eżamijiet). Kull min jissodisfa r-rekwiżiti jista’ jiġi aċċettat jekk ikun hemm biżżejjed postijiet disponibbli.
Prattiki u ditti legali privati (perjodu ta’ taħriġ prattiku). Skont il-provvista u d-domanda fis-suq tax-xogħol.
Hemm rotot ta’ aċċess alternattivi għat-taħriġ?
Perjodu ta’ taħriġ prattiku:
Hemm rotot ta’ aċċess alternattivi mill-ġudikatura, mis-servizzi ta’ prosekuzzjoni, eċċ.
Korsijiet u eżamijiet:
Ma hemm l-ebda rotta ta’ aċċess alternattiva. Huma meħtieġa baċellerat Daniż fil-liġi u lawrja ta’ Master Daniża fil-liġi.
Il-format u l-kontenut tat-taħriġ inizjali
X’inhuma t-tul u l-perjodi ta’ żmien tat-taħriġ?
Perjodu ta’ taħriġ prattiku ta’ 3 snin ma’ avukat kwalifikat. It-tul ta’ żmien huwa ffissat, iżda jista’ jkun limitat għal sena ma’ avukat kwalifikat jekk il-kandidat ikollu esperjenza legali rilevanti oħra mill-ġudikatura, is-servizz tal-prosekuzzjoni, eċċ. Matul il-perjodu ta’ taħriġ prattiku, il-kandidat irid jattendi numru ta’ korsijiet u jgħaddi minn żewġ eżamijiet.
Kif jiġi organizzat it-taħriġ?
L-amministrazzjoni tal-korsijiet, l-eżamijiet eċċ. titwettaq prinċipalment internament (l-Għaqda Daniża tal-Avukati) filwaqt li l-korsijiet u l-eżamijiet jitwettqu esternament.
Min huma l-ħarrieġa?
Il-biċċa l-kbira tal-ħarrieġa huma professjonisti full-time.
X’inhu l-kontenut u l-objettivi tat-taħriġ inizjali?
Il-liġi proċedurali
Ħiliet legali
Ħiliet professjonali mhux legali (eż. komunikazzjoni u negozjar)
Min ifassal il-programmi ta’ taħriġ inizjali?
L-Għaqda Daniża tal-Avukati f’kooperazzjoni mal-kumitat tat-taħriġ tal-Ministeru tal-Ġustizzja (dan il-kumitat huwa responsabbli għat-taħriġ inizjali).
Liema metodoloġija tintuża għat-taħriġ?
Lekċers, eżerċizzji, inklużi moot court, ħdim ta’ partijiet eċċ.
Liema elementi prattiċi tat-taħriġ huma applikabbli għat-trainees?
Ir-rekwiżiti:
- Baċellerat Daniż u lawrja ta’ Master Daniża fil-liġi (ara hawn fuq)
- It-trainee jrid ikun irreġistra għall-korsijiet kollha, u l-korsijiet kollha jridu jkunu tħallsu.
- Eżami bil-miktub li għadda.
- Eżami fil-litigazzjoni li għadda.
- Perjodu ta’ taħriġ prattiku ta’ 3 snin (inkluża esperjenza fil-litigazzjoni).
Kif jiġu evalwati/ivvalutati t-trainees? Kemm-il darba u minn min?
Eżami wieħed bil-miktub (jistgħu jsiru tliet tentattivi). Bħalissa, l-eżamijiet bil-miktub isiru erba’ darbiet fis-sena.
Eżami wieħed fil-litigazzjoni - kawża reali tal-qorti jew kawża fittizja tal-qorti (huma possibbli tliet tentattivi biex wieħed jgħaddi). L-eżamijiet f’kawżi reali tal-qorti jsiru regolarment matul is-sena. L-eżamijiet f’kawżi fittizji tal-qorti bħalissa qed isiru erba’ darbiet fis-sena.
Hemm xi attivitajiet ta’ taħriġ imwettqa flimkien ma’ professjonisti legali oħra? Jekk iva: Kif jaħdem il-proċess?
Hemm perjodu ta’ taħriġ prattiku fejn it-trainee jaħdem taħt is-superviżjoni ta’ avukat (“Advokat” Daniż) u jkun hemm eżami fil-litigazzjoni f’kooperazzjoni ma’ mħallfin, kollegi eċċ.
X’inhuma l-ispeċifiċitajiet rigward it-taħriġ fid-dritt tal-UE, it-taħriġ lingwistiku u l-komponenti Ewropej tat-taħriġ inizjali, pereżempju l-parteċipazzjoni f’attivitajiet tas-CCBE jew tal-ELF?
Korsijiet u eżamijiet: Ma hemm l-ebda taħriġ speċifiku fid-dritt tal-UE (indirettament biss permezz ta’ taħriġ fil-ġlieda kontra l-ħasil tal-flus eċċ.) u l-ebda taħriġ lingwistiku.
Kemm-il trainee huma aċċettati għat-taħriġ? In-numru ta’ trainees huwa aġġustat kull sena u minn min?
Bħalissa hemm madwar 600 trainee fis-sena.
L-għadd ta’ trainees aċċettati jiddependi fuq id-domanda u n-numru ta’ postijiet disponibbli. Jekk id-domanda taqbeż b’mod kontinwu u sinifikanti l-għadd ta’ postijiet disponibbli, l-Għaqda Daniża tal-Avukati f’kooperazzjoni mal-kumitat tat-taħriġ tal-Ministeru tal-Ġustizzja se tikkunsidra li tistabbilixxi aktar korsijiet.
Terminazzjoni tal-proċess ta’ taħriġ u kwalifika inizjali
It-taħriġ inizjali jikkonkludi b’eżami finali? Kif jiġi organizzat? Min hu responsabbli għall-eżami?
Iva, eżami bil-miktub u eżami prattiku fil-litigazzjoni.
L-Għaqda Daniża tal-Avukati torganizza l-eżami bil-miktub u l-eżami prattiku fil-litigazzjoni f’kawża fittizja u tamministra l-eżami prattiku fil-litigazzjoni f’kawża reali. Il-Kumitat tat-taħriġ tal-Ministeru tal-Ġustizzja huwa responsabbli għat-taħriġ/korsijiet u l-eżamijiet.
Hemm proċedura oħra ta’ reklutaġġ biex wieħed isir avukat mat-tlestija tat-taħriġ inizjali?
Wara t-tlestija tal-perjodu ta’ taħriġ prattiku u l-korsijiet u l-eżamijiet obbligatorji, il-kandidat irid japplika għall-ammissjoni mal-Ministeru tal-Ġustizzja. Abbażi tad-dokumentazzjoni ppreżentata, il-Ministeru tal-Ġustizzja se jivvaluta jekk il-kandidat jistax jiġi ammess jew le u jingħata t-titolu ta’ “Advokat”.