1 L-eżistenza ta’ ordni għal proċeduri għall-ħlas
1.1 L-ambitu tal-proċedura
Iva. Hemm proċedura ta’ ordni ta’ ħlas (Mahnverfahren) għall-eżekuzzjoni simplifikata ta’ talbiet skont l-Artikoli 688 et seq. tal-Kodiċi tal-Proċedura Ċivili (Zivilprozessordnung).
1.1.1 Liema talbiet huma eliġibbli (pereżempju talbiet fi flus biss, talbiet kuntrattwali biss eċċ.)?
Din il-proċedura ġeneralment tista’ tintuża meta t-talba tkun għall-ħlas ta’ somma fissa ta’ flus f’EUR.
Madankollu, ma tistax tintuża f’dawn il-każijiet:
- talbiet li jirriżultaw minn ftehim ta’ kreditu lill-konsumatur b’rata ta’ imgħax ta’ aktar minn 12-il punt perċentwali ogħla mir-rata bażika,
- talbiet li jiddependu fuq it-twettiq ta’ obbligi li għad iridu jitwettqu,
- jekk l-ordni ta’ ħlas ikollha tiġi nnotifikata permezz ta’ avviż ippubblikat minħabba li l-indirizz tal-intimat ma jkunx magħruf.
1.1.2 Hemm limitu massimu fir-rigward tal-valur tat-talba?
Ma hemmx livell massimu għas-somma li tista’ tintalab.
1.1.3 L-użu ta’ dik il-proċedura huwa fakultattiv jew obbligatorju?
L-użu tal-proċedura tal-ordni ta’ ħlas mill-kreditur mhix obbligatorja. Il-kreditur jista’ jagħżel bejn din il-proċedura u litigazzjoni ordinarja.
1.1.4 Din il-proċedura hija disponibbli jekk l-intimat jgħix fi Stat Membru ieħor jew f’pajjiż terz?
Fil-prinċipju, il-proċedura ta’ ordni ta’ ħlas Ġermaniża tista’ tintuża wkoll jekk l-intimat huwa residenti fi Stat Membru ieħor jew f’pajjiż terz. Madankollu, għandu jiġi nnutat illi l-Artikolu 688(3) tal-Kodiċi tal-Proċedura Ċivili jipprovdi li, f’każijiet fejn l-ordni ta’ ħlas irid jiġi nnotifikat barra l-pajjiż, il-proċedura għall-ordni ta’ ħlas tista’ tintuża biss jekk dan ikun previst fl-Att dwar ir-Rikonoxximent u l-Eżekuzzjoni tas-Sentenzi (Anerkennungs- und Vollstreckungsausführungsgesetz) jew l-Att dwar il-Manteniment Barrani (Auslandsunterhaltsgesetz), jew jekk in-notifika se ssir fi Stat Membru tal-UE. Minbarra l-Istati Membri tal-UE, proċedura ta’ ordni ta’ ħlas hija permessa wkoll fil-każ ta’ notifika fl-Iżlanda, fin-Norveġja, fl-Iżvizzera jew fl-Iżrael.
1.2 Il-qorti kompetenti
Il-ġuriżdizzjoni unika għall-proċedura ta’ ordni ta’ ħlas hija tal-qorti lokali (Amtsgericht) li għandha l-ġuriżdizzjoni ordinarja għar-rikorrent. Dan jiġi determinat mill-post ta’ residenza tiegħu jew, f’każ ta’ entità ġuridika, mill-uffiċċju reġistrat tagħha. Madankollu, l-istati federali Ġermaniżi kollha stabbilew qrati ċentrali għal każijiet ta’ ordnijiet ta’ ħlas (www.mahngerichte.de). Dan ifisser illi l-ġuriżdizzjoni għall-proċedimenti ta’ ordni ta’ ħlas ġiet ikkonċentrata f’għadd ta’ qrati lokali jew anke f’qorti lokali waħda f’dak l-istat federali. F’dawn il-każijiet il-post ta’ ġuriżdizzjoni ordinarja tar-rikorrent hija fil-qorti ċentrali tal-ordni ta’ ħlas li għandha ġuriżdizzjoni fil-post ta’ residenza tiegħu.
Jekk ir-rikorrent m’għandux post ta’ ġuriżdizzjoni ordinarja fil-Ġermanja, il-qorti lokali ta’ Wedding f’Berlin għandha l-ġuriżdizzjoni esklussiva. Jekk l-intimat ma jkollux post ta’ ġuriżdizzjoni ordinarja fil-Ġermanja, il-ġuriżdizzjoni tkun tal-qorti lokali li kieku jkollha ġuriżdizzjoni għall-proċedimenti ordinarji irrispettivament minn kwalunkwe distinzjoni ta’ ġuriżdizzjoni minħabba s-suġġett (ġeneralment il-qrati lokali jkollhom ġuriżdizzjoni biss għal tilwim li jinvolvu massimu ta’ EUR 5 000). Hawnhekk ukoll jista’ jkun hemm qrati ċentrali għall-ordnijiet ta’ ħlas f’xi stati federali.
1.3 Ir-rekwiżiti formali
1.3.1 L-użu ta’ formola standard huwa obbligatorju? (jekk iva, minn fejn tista’ tinkiseb din il-formola?)
L-użu ta’ formola stampata minn qabel huwa obbligatorju jekk ikunu disponibbli formoli għad-dikjarazzjoni jew it-talba kkonċernata. Hemm formoli, pereżempju, għar-rikorsi għall-ħruġ u l-ħruġ mill-ġdid ta’ ordnijiet għall-ħlas u l-eżekuzzjoni.
Il-proċeduri għal ordni ta’ ħlas huma awtomatizzati fl-istati federali kollha. Hawnhekk t-talbiet jistgħu isiru jew fuq formoli stampati minn qabel jew bl-iskambju elettroniku tad-data. Numru ta’ fornituri tas-software joffru programmi tas-software għall-preżentazzjoni elettronika tat-talbiet fi proċeduri awtomatizzati ta’ ordni ta’ ħlas. Fil-qrati lokali kollha huwa wkoll possibbli li jsiru talbiet online.
Il-formoli stampati minn qabel għall-proċeduri ta’ ordnijiet ta’ ħlas jistgħu jinxtraw mingħand ħwienet tal-gazzetti jew online.
1.3.2 Jeħtieġ li nkun rappreżentat minn avukat?
Le, mhix meħtieġa r-rappreżentanza legali.
1.3.3 Kemm trid tkun dettaljata r-raġuni għat-talba?
Ir-raġunijiet li fuqhom hija bbażata t-talba ma hemmx għalfejn jiġu mfissra fid-dettal. Kull ma hu meħtieġ hija dikjarazzjoni fil-qosor tat-talba u l-ammont speċifiku ta’ flus mitlub. Dan isir billi jimtlew il-kaxex fil-formola stampata minn qabel għall-proċedura ta’ ordni ta’ ħlas. It-talbiet prinċipali u sekondarji jridu jitniżżlu separatament.
1.3.4 Huwa meħtieġ li tiġi ppreżentata prova bil-miktub fir-rigward tat-talba kkonċernata? Jekk iva, liema dokumenti huma ammissibbli bħala provi?
Ma hemmx għalfejn jiġu preżentati provi dokumentarji għat-talbiet.
1.4 Iċ-ċaħda ta’ rikors
Ir-rikors għal ordni ta’ ħlas jiġi miċħud jekk il-proċedura ta’ ordni ta’ ħlas mhix ammissibbli, jekk il-qorti li quddiemha titressaq it-talba ma għandhiex ġuriżdizzjoni, jew jekk ir-rikors għall-ħlas mhux konformi mar-rekwiżiti formali. Ir-rikors jiġi miċħud ukoll jekk l-ordni ta’ ħlas tista’ tinħareġ biss għal parti mit-talba. Ir-rikorrent għandu jinstema’ qabel ma jiġi miċħud l-ordni.
Il-qorti ma għandhiex għalfejn teżamina jekk it-talba hix attwalment ġustifikata qabel ma tagħti l-ordni ta’ ħlas.
1.5 Appell
Ġeneralment ma hemmx appell minn ordni ta’ ħlas miċħud. Oġġezzjoni immedjata (sofortige Beschwerde) hija possibbli biss jekk ir-rikors kien ġie trażmess biss f’forma li tinqara elettronikament u ġie miċħud għaliex il-qorti dehrilha li dik il-forma ma kinitx adattata għall-ipproċessar elettroniku; madankollu, fil-prattika din ir-regola mhix ta’ importanza kbira.
1.6 Dikjarazzjoni ta’ kontradizzjoni
Jekk l-ordni ta’ ħlas tinħareġ u tiġi nnotifikata lill-intimat, l-intimat ikollu ġimagħtejn min-notifika sabiex jopponih. Madankollu, dikjarazzjoni ta’ oġġezzjoni xorta tibqa’ valida anke wara din l-iskadenza, sakemm ma tkunx inħarġet ordni ta’ eżekuzzjoni. Barra minn hekk, dikjarazzjoni ta’ oppożizzjoni tard titqies bħala oġġezzjoni għall-ordni ta’ eżekuzzjoni.
Meta l-ordni ta’ ħlas tiġi nnotifikata, l-intimat jirċievi formola stampata minn qabel li tippermettilu joġġezzjona. L-użu ta’ din il-formola stampata minn qabel, madankollu, mhux obbligatorju. Dan ifisser illi dikjarazzjoni ta’ oġġezzjoni tista’ ssir f’forma oħra; l-uniku rekwiżit formali huwa li trid tkun bil-miktub.
1.7 L-effett tad-dikjarazzjoni ta’ kontradizzjoni
Jekk l-intimat joġġezzjona fil-ħin, ma tistax tinħareġ ordni tal-eżekuzzjoni, u t-talba fl-ordni ta’ ħlas ma tistax tiġi eżegwita. Madankollu, il-każ ma jiġix trattat awtomatikament permezz tal-litigazzjoni ordinarja. Dan ikun jeħtieġ rikors espress għal proċedimenti ordinarji, li jista’ jsir jew mir-rikorrent jew mill-intimat fil-proċedura ta’ ordni ta’ ħlas. Ir-rikorrent jista’ jagħżel li jippreżenta dan ir-rikors malli jsir jaf bid-dikjarazzjoni tal-oġġezzjoni, u jista’ jehmżu wkoll mal-ordni ta’ ħlas innifsu bħala miżura kawtelatorja.
1.8 L-effett tan-nuqqas ta’ dikjarazzjoni ta’ kontradizzjoni
1.8.1 X’jeħtieġ li jsir sabiex tinkiseb deċiżjoni eżekuttiva?
Il-qorti mbagħad, fuq talba tal-partijiet, toħroġ ordni għall-eżekuzzjoni. Ir-rikors ma jistax isir qabel it-tmiem taż-żmien permess għad-dikjarazzjoni tal-oġġezzjoni; għandu jkun fih dikjarazzjoni ta’ liema pagamenti, jekk ikun hemm, saru fir-rigward tal-ordni ta’ ħlas. Jekk ikunu sar ħlas parzjali, ir-rikorrent irid inaqqas l-ammont mitlub skont il-każ.
1.8.2 Din id-deċiżjoni tkun finali jew ikun għad fadal il-possibilità li l-intimat jappella minnha?
L-ordni għall-eżekuzzjoni huwa ekwivalenti għal sentenza provviżorjament eżegwibbli. Oġġezzjoni tista’ ssir fi żmien ġimagħtejn wara n-notifika.