1. Portali nazzjonali tal-IT għall-komunikazzjoni mal-qrati jew ma’ awtoritajiet oħra
Din l-informazzjoni tkopri portali nazzjonali tal-IT f’materji ċivili u kummerċjali li ġew żviluppati mill-gvern jew f’ismu għall-finijiet ta’ parteċipazzjoni fi proċeduri ġudizzjarji permezz ta’ komunikazzjoni elettronika bejn persuni fiżiċi u ġuridiċi u l-awtoritajiet kompetenti rispettivi.
| Organizzazzjoni | Isem tal-portal tal-IT | Jistgħu ċittadini mhux Netherlandiżi u persuni mhux residenti jużaw il-portal? | Għal xiex jista’ jintuża l-portal? Japplikaw xi rekwiżiti speċjali għall-użu tal-portal? | Kif jiġu identifikati l-utenti? |
| Assoċjazzjoni Rjali Netherlandiża tan-Nutara tal-Liġi Ċivili (Koninklijke Notariële Beroepsorganisatie – KNB) | Notarisnet | Iva u le: l-informazzjoni ġenerali hija disponibbli bl-Ingliż. Informazzjoni aktar dettaljata hija disponibbli għal applikazzjonijiet speċifiċi (inkorporazzjoni diġitali ta’ kumpanija u identifikazzjoni diġitali tal-klijenti). |
Notaris.nl huwa portal tal-konsumatur komprensiv li joffri informazzjoni dwar is-servizzi pprovduti mill-professjoni notarili fin-Netherlands, maqsuma f’diversi oqsma tal-liġi. Dan huwa maħsub bħala informazzjoni ġenerali li tissupplimenta s-siti web speċifiċi tat-850 ditta notarili. Dan jinkludi wkoll karatteristiċi bħal ktieb tal-indirizzi li jkun fih dettalji tad-ditti kollha u diversi għażliet ta’ kuntatt. Dan is-sit dalwaqt se jiġi estiż biex jinkludi taqsima “L-ambjent tiegħi”, fejn il-konsumaturi se jkunu jistgħu jużaw is-servizzi notarili u jaraw dokumenti f’ambjent magħluq. Jekk id-dokumenti jkollhom jiġu ffirmati b’mod diġitali, tkun meħtieġa firma elettronika kwalifikata. |
Jekk ikun meħtieġ li tiġi stabbilita l-identità ta’ persuna għas-servizzi tal-konsumatur, dan irid isir bl-użu ta’ karta tal-identità fiżika valida, karta tal-identità elettronika u/jew pass addizzjonali ta’ verifika diġitali li jinvolvi l-qari taċ-ċippa tal-komunikazzjoni b'kamp fil-qrib (NFC, near-field communication) ta’ karta tal-identità fiżika. |
| Ġudikatura Netherlandiża (Rechtspraak) | Mijn Rechtspraak (Il-Ġudikatura Tiegħi) | Iva, jekk ikollhom log-in Ewropew rikonoxxut. |
Il-portal jista’ jintuża għas-suġġetti li ġejjin (aktar informazzjoni hija disponibbli f’Mijn Rechtspraak): Ċittadini
Organizzazzjonijiet
Professjonisti (avukat / professjonist legali)
|
Ċittadini
Organizzazzjonijiet
Professjonisti (avukat / professjonist legali)
|
| Ġudikatura Netherlandiża (Rechtspraak) | Mijn CBM (My GAC) (kustodja, amministrazzjoni u kurazija) | Le, il-partijiet barranin fil-prinċipju ma għandhomx DigiD u ma jistgħux jilloggjaw fil-portal web. |
Il-ġenerazzjoni u s-sottomissjoni ta’ rapporti u talbiet, inklużi:
Kustodju, amministratur jew kuratur professjonali ma jistax ikollu aċċess għal Mijn CBM. |
|
| Il-Kunsill tal-Istat (Raad van State) | Loket Raad van State (Punt ta’ Servizz tal-Kunsill tal-Istat) |
Iċ-ċittadini jistgħu jieħdu azzjoni legali b’mod diġitali kontra deċiżjoni ta’ korp amministrattiv jew kontra sentenza tal-qorti. Il-formoli disponibbli minn dan il-punt ta’ servizz huma maħsuba biss għaċ-ċittadini. L-avukati, il-kumpaniji, l-organizzazzjonijiet u l-korpi amministrattivi jistgħu jippreżentaw appelli u jissottomettu dokumenti relatati ma’ kawża b’mod diġitali bl-użu tal-metodu Veilig Mailen (Email sigura). |
|
|
| Il-Kunsill tal-Istat (Raad van State) | Mijn Zaak (Il-Kawża Tiegħi) | Le, l-avukati b’Advocatenpas biss għandhom aċċess għal Mijn Zaak. |
Fil-preżent, Mijn Zaak qed jintuża esklussivament għal avukati f’kawżi ta’ ażil u detenzjoni. Ma tridx tuża Mijn Zaak biex tissottometti dokumenti kunfidenzjali, kif imsemmi fit-Taqsima 8:29 tal-Att Ġenerali dwar il-Liġi Amministrattiva (Algemene wet bestuursrecht). Tista’ ssir taf kif tissottometti dokumenti kunfidenzjali fir-regoli ta’ proċedura (procesreglement). |
|
| Il-Qorti Suprema (Hoge Raad) | Mijn Zaak Hoge Raad (Il-Kawża tal-Qorti Suprema Tiegħi) | Le, il-partijiet barranin fil-prinċipju ma għandhomx DigiD, eHerkenning log-in, Advocatenpas (Permess ta’ avukat) jew Gemachtigdenpas (Permess għall-impjegati tal-avukati) u ma jistgħux jilloggjaw fil-portal web. |
Il-portal jista’ jintuża għas-suġġetti li ġejjin (aktar informazzjoni hija disponibbli f’Mijn Rechtspraak): Materji kriminali
Materji fiskali u amministrattivi
|
|
| Aġenzija Ċentrali tal-Ġbir Ġudizzjarju (Centraal Justitieel Incassobureau – CJIB) | Iva, jekk ikollhom log-in Ewropew rikonoxxut. |
|
|
|
| Aġenzija Ċentrali tal-Ġbir Ġudizzjarju (Centraal Justitieel Incassobureau – CJIB) | CJIB Businessportaal (Portal tan-Negozju tas-CJIB) | Le, il-partijiet barranin fil-prinċipju ma għandhomx log-in tal-eHerkenning u ma jistgħux jilloggjaw fil-portal web. |
Konsulent jew amministratur tad-dejn
Kumpanija bi flotta kbira ta’ vetturi
Konsulent legali
Organizzazzjonijiet tas-settur pubbliku
|
|
2. Il-leġiżlazzjoni nazzjonali dwar l-użu ta’ vidjokonferenzi f’materji ċivili u kummerċjali
Din it-taqsima tipprovdi informazzjoni dwar il-liġi u l-proċeduri nazzjonali relatati mal-parteċipazzjoni f’seduti permezz ta’ vidjokonferenzi f’materji ċivili u kummerċjali.
a. Informazzjoni dwar il-liġi u l-proċeduri nazzjonali applikabbli (inklużi d-drittijiet u s-salvagwardji proċedurali applikabbli) li jirregolaw is-seduti mwettqa bl-użu ta’ vidjokonferenza jew teknoloġija oħra ta’ komunikazzjoni mill-bogħod
Skont il-liġi ċivili u kummerċjali, għad ma hemm l-ebda regolament speċifiku dwar l-użu tal-vidjokonferenzi matul is-seduti tal-qorti. Il-liġi ċivili u kummerċjali ma toħloqx ostaklu għall-użu tal-vidjokonferenzi. Bil-kunsens tal-partijiet kollha kkonċernati, seduta tista’ ssir kompletament online. Parti fil-kawża, parti interessata jew parti professjonali jistgħu jipparteċipaw ukoll f’seduta b’mod diġitali. B’kunsiderazzjoni xierqa għall-interessi tal-partijiet u t-trattament ugwali tal-partijiet, l-imħallef jiddeċiedi jekk waħda biss mill-partijiet tistax tipparteċipa b’mod diġitali f’seduta li altrimenti tkun qed issir personalment.
F’April 2022, il-Ministru għall-Protezzjoni Legali informa lill-kamra inferjuri tal-Parlament Netherlandiż dwar il-pjanijiet tiegħu li jfassal regolamenti statutorji konsistenti dwar l-użu tal-vidjokonferenzi matul is-seduti quddiem il-qrati ċivili u amministrattivi. Fil-qosor, l-intenzjoni hija li r-regolamenti statutorji jistabbilixxu ċ-ċirkostanzi li fihom il-vidjokonferenzi jistgħu jintużaw matul seduta tal-qorti u s-salvagwardji proċedurali u tekniċi li se japplikaw. Ir-regolamenti se jkunu ta’ natura ta’ faċilitazzjoni, jiġifieri jkun f’idejn il-qorti distrettwali jew il-qorti tal-appell li toffri din il-faċilità. L-imħallef imbagħad jiddeċiedi jekk il-vidjokonferenzi jistgħux jintużaw f’kawża speċifika; f’kawżi amministrattivi u ċerti kategoriji ta’ kawżi ċivili, il-vidjokonferenzi jistgħu jintużaw biss jekk parti waħda jew aktar tkun trid tużahom.
b. Informazzjoni dwar jekk il-qrati biss jistgħux iwettqu vidjokonferenza abbażi tal-Artikolu 5 tar-Regolament dwar id-Diġitalizzazzjoni jew jekk din l-għażla hijiex miftuħa wkoll għal awtoritajiet oħra. Jekk awtoritajiet oħra jistgħu wkoll jużaw l-Artikolu 5 bħala bażi legali għall-organizzazzjoni ta’ vidjokonferenzi, informazzjoni dwar liema awtoritajiet dawn huma u għal liema proċedimenti tista’ tintuża
F’materji ċivili u kummerċjali, il-qrati biss huma awtorizzati jużaw il-vidjokonferenzi biex jorganizzaw seduti online (jew parzjalment online).
c. Il-liġi nazzjonali tippermetti lill-qorti jew lill-awtorità kompetenti li jiskedaw seduta ex officio?
Skont il-liġi ċivili u kummerċjali, għad ma hemm l-ebda regolament speċifiku dwar l-użu tal-vidjokonferenzi matul is-seduti tal-qorti. Fil-preżent, l-imħallef jiddeċiedi jekk il-vidjokonferenzi għandhomx jintużaw f’każ speċifiku, jekk waħda jew aktar mill-partijiet tixtieq tużahom.
d. It-teknoloġiji tal-vidjokonferenzi huma disponibbli fin-Netherlands u x’inhi l-aktar pjattaforma komuni?
Il-qrati distrettwali u l-qrati tal-appell għandhom aċċess għal tliet pjattaformi għall-organizzazzjoni ta’ seduti diġitali u biex waħda mill-partijiet tkun tista’ tipparteċipa b’mod diġitali, jiġifieri: Microsoft Teams, Cisco Meeting Service (CMS) u Unità ta' Kontroll tal-Punti Multipli (MCU, Multipoint Control Unit) tal-ġudikatura Netherlandiża. Is-seduti mill-awli jew mill-awli tal-qorti fl-istituzzjonijiet penali dejjem jiġu ffaċilitati permezz ta’ Teams. Fil-każijiet l-oħra kollha, l-imħallef jiddeċiedi liema pjattaformi jintużaw.
Għat-Teams u s-CMS, il-gwidi huma disponibbli fuq is-sit web tal-Kunsill għall-Ġudikatura (Raad voor de Rechtspraak). Fil-każ tal-MCU, il-qorti distrettwali jew il-qorti tal-appell tikkondividi l-informazzjoni tal-utent mal-parteċipanti qabel is-seduta.
e. Informazzjoni dwar ir-rekwiżiti proċedurali għall-partijiet li jixtiequ jagħtu l-opinjoni tagħhom dwar l-użu tal-vidjokonferenzi jew teknoloġija oħra għall-parteċipazzjoni mill-bogħod f’seduta
Il-parteċipanti f’seduta jistgħu jitolbu lill-qorti distrettwali jew lill-qorti tal-appell biex tippermettilhom jipparteċipaw fis-seduta b’mezzi diġitali jew sabiex jorganizzaw is-seduta kompletament b’mod diġitali. L-imħallef jiddeċiedi jekk il-parteċipazzjoni diġitali jew seduta kompletament diġitali hijiex possibbli.
f. Kif jiġi żgurat l-aċċess għall-vidjokonferenzi għall-partijiet u r-rappreżentanti tagħhom, inklużi l-persuni b’diżabbiltà?
Fuq talba, il-partijiet jistgħu jipparteċipaw b’mod attiv f’seduta diġitali permezz tal-MCU. L-MCU jiżgura konnessjoni diretta u sigura bil-vidjo bejn il-parteċipanti u l-persuni fiżikament preżenti fl-awla tal-qorti. Tagħmel ukoll possibbli l-komunikazzjoni diretta bejn il-parteċipanti diġitali u fiżiċi.
Għal seduti f’każijiet fejn il-partijiet ikunu indikaw li l-parteċipazzjoni diġitali attiva ma hijiex mixtieqa, tista’ ssir laqgħa permezz ta’ Teams, b’restrizzjonijiet fuq dawk li jattendu b’mod diġitali. F’tali każijiet, huwa possibbli li wieħed jirċievi biss vidjo u awdjo mill-awla tal-qorti permezz ta’ Teams.
Jekk ikun meħtieġ, test tal-kamra tal-MCU jista’ jiġi organizzat ferm qabel is-seduta għall-partijiet u r-rappreżentanti legali tagħhom, biex tiġi evitata kwalunkwe problema bil-programm u l-konnessjoni fil-ħin tas-seduta. L-istruzzjonijiet bil-miktub huma disponibbli wkoll. Barra minn hekk, meta tibda seduta dejjem ikun hemm persunal tal-IT preżenti fl-awla tal-qorti biex jipprovdi appoġġ u jiżgura li s-seduta diġitali taħdem bla xkiel.
Bħalissa, il-ġudikatura Netherlandiża ma għandha l-ebda faċilità integrata speċifika għall-parteċipanti b’diżabilità. Fi proċedura ta’ sejħa għall-offerti li għaddejja bħalissa għal soluzzjoni ġdida għal seduti online, l-aċċessibbiltà ġiet inkluża fis-sett ta’ rekwiżiti.
g. Il-liġi nazzjonali tippermetti li jiġu rreġistrati s-seduti?
In-Netherlands ma għandhom l-ebda leġiżlazzjoni speċifika dwar l-użu tal-vidjokonferenzi f’materji ċivili u kummerċjali. Dan ifisser li lanqas ma hemm leġiżlazzjoni dwar ir-reġistrazzjoni ta’ seduti online u ma hemm l-ebda dispożizzjoni dwar il-ħżin u t-tixrid tar-reġistrazzjonijiet.
Mhux permess li jsiru reġistrazzjonijiet (vidjo u/jew awdjo) mingħajr il-permess tal-imħallef. Lanqas ma huwa permess li jsiru reġistrazzjonijiet vidjo u/jew awdjo fil-bini tal-qorti. Dan japplika għaż-żoni ta’ akkoljenza, l-awli tal-qorti u l-kmamar ta’ stennija.
h. Il-liġi nazzjonali kif tiżgura li kwalunkwe reġistrazzjoni ssir u tinħażen b’mod sigur u ma tkunx aċċessibbli għall-pubbliku?
In-Netherlands ma għandhom l-ebda leġiżlazzjoni speċifika dwar l-użu tal-vidjokonferenzi f’materji ċivili u kummerċjali. Dan ifisser li lanqas ma hemm leġiżlazzjoni dwar ir-reġistrazzjoni ta’ seduti online u ma hemm l-ebda dispożizzjoni dwar il-ħżin u t-tixrid tar-reġistrazzjonijiet.
i. Informazzjoni dwar kif l-avukati u l-klijenti jistgħu jikkomunikaw b’mod kunfidenzjali qabel u matul seduta online
Kundizzjoni waħda li tapplika għall-użu tal-vidjokonferenzi għal seduti online hija li jiġi żgurat li l-avukat u l-klijent ikunu jistgħu jitkellmu ma’ xulxin b’mod kunfidenzjali, mingħajr ma persuni oħra jkunu jistgħu jisimgħu. Bħalissa, it-teknoloġija ma tappoġġjax kanal separat u sigur għal diskussjoni kunfidenzjali fi ħdan is-seduta online. Madankollu, tali kapaċità qed tiġi żviluppata. Sakemm il-faċilità teknika ssir disponibbli għall-istabbiliment ta’ kanal sigur fl-istess konnessjoni bil-vidjo, il-partijiet jistgħu jikkonsultaw lil xulxin bit-telefown jew f’kamra separata.
j. Kif jiġu identifikati u awtentikati l-partijiet?
B’mod ġenerali, qabel is-seduta, ir-reġistratur tal-qorti jistaqsi lir-rappreżentanti legali biex isir jaf min se jkun qed jipparteċipa b’mod diġitali permezz tal-MCU. L-MCU huwa apparat diġitali għall-organizzazzjoni tal-vidjokonferenzi. Ir-reġistratur tal-qorti jibgħat ħolqa lill-persuni rreġistrati biex jaċċessaw is-seduta online u jitlob lir-riċevituri biex ma jxerrduħx. Fil-bidu tas-seduta, il-persuni kollha preżenti fis-seduta online jintalbu jippreżentaw ruħhom, u ssir verifika biex jiġi żgurat li dawn ikunu l-persuni li isimhom ikun ġie kkomunikat qabel. Partijiet mhux awtorizzati jitneħħew mis-seduta online.
Il-parteċipanti permezz ta’ Teams ma humiex immonitorjati b’mod attiv, peress li ma huwiex possibbli għalihom li jaqsmu l-vidjo u l-awdjo.
k. Kif jistgħu l-partijiet jistaqsu mistoqsijiet u jipparteċipaw b’mod sinifikanti?
L-MCU jippermetti li tiġi stabbilita konnessjoni diretta bejn il-parteċipanti diġitali u l-persuni fiżikament preżenti fl-awla tal-qorti. Il-kameras u l-moniters installati fl-awla tal-qorti jippermettu lill-imħallfin u lill-avukati jikkomunikaw direttament mal-parteċipanti diġitali. Jekk konnessjoni Teams, huwa possibbli biss li tirċievi vidjo u awdjo mill-awla tal-qorti. Il-parteċipazzjoni attiva permezz ta’ Teams ma hijiex possibbli.
l. Il-partijiet kif jibbenefikaw mid-dritt għall-interpretazzjoni?
Hemm żewġ sitwazzjonijiet possibbli għall-interpretazzjoni matul is-seduti online:
- L-interpreti jipparteċipaw biss b’mod diġitali.
- L-interpreti huma fiżikament preżenti fl-awla tal-qorti.
Fiż-żewġ każijiet, il-partijiet jingħataw il-parir li jistabbilixxu laqgħa separata għall-interpretazzjoni li fiha jipparteċipaw kemm il-parteċipanti fiżiċi kif ukoll l-interpreti. Il-qorti ma hijiex responsabbli għal-laqgħa diġitali stabbilita mill-partijiet għall-finijiet ta’ interpretazzjoni. Il-parteċipanti diġitali li jużaw il-konnessjoni stabbilita mill-qorti jitfu l-awdjo tagħhom meta l-interpretazzjoni tkun qed issir permezz ta’ laqgħa separata.
m. Kif jiġi żgurat li l-evidenza fiżika tkun tista’ tintwera u tiġi ppreżentata matul seduta online?
L-MCU sigur jippermetti lill-partijiet jippreżentaw evidenza diġitali lill-parteċipanti diġitali kemm permezz tal-vidjo kif ukoll awdjo.
n. Kif jiġi evitat l-aċċess mhux awtorizzat għal data sensittiva u flussi ta’ data lil entitajiet mhux magħrufa?
Il-partijiet jingħataw l-istruzzjoni li ma jgħaddux il-ħolqa użata biex jaċċessaw il-konnessjoni tal-MCU, peress li dan ma huwiex permess. Lanqas ma huwa permess li jsiru u jiġu kondiviżi r-reġistrazzjonijiet. Barra minn hekk, partijiet mhux awtorizzati jitneħħew mill-konnessjoni MCU. Madankollu, ma hemm l-ebda mod kif jiġi vverifikat jekk humiex qed isiru reġistrazzjonijiet tal-immaġnijiet minn konnessjoni MCU jew Teams, u għalhekk huwa impossibbli li dan jiġi evitat.
Fil-prinċipju, il-kawżi kummerċjali jinstemgħu fil-pubbliku.
o. Informazzjoni dwar dettalji prattiċi għall-organizzazzjoni u t-twettiq ta’ seduta online, inkluża informazzjoni dwar jekk tintużax teknoloġija "speech-to-text"
Jekk imħallef jiddeċiedi li jorganizza seduta diġitali, bil-kunsens ta’ parti waħda jew aktar, l-informazzjoni prattika tiġi kondiviża qabel is-seduta mal-parti jew mal-partijiet li jkunu se jipparteċipaw b’mod diġitali. Il-gwida msemmija fil-punt (d) tgħin lill-partijiet jistabbilixxu konnessjoni permezz ta’ Teams jew CMS u tispjega l-faċilitajiet diġitali li se jkunu disponibbli matul is-seduta.
Ma tintuża l-ebda teknoloġija "speech-to-text" f’seduti diġitali f’kawżi ċivili u kummerċjali.
3. Il-leġiżlazzjoni nazzjonali dwar l-użu ta’ vidjokonferenzi f’materji kriminali
Din it-taqsima tipprovdi lill-persuni suspettati, akkużati jew ikkundannati, jew lill-persuni affettwati kif definiti fl-Artikolu 2(10) tar-Regolament (UE) 2018/1805, li se jipparteċipaw fil-vidjokonferenza, b’informazzjoni dwar ir-rekwiżiti proċedurali stabbiliti fil-liġi nazzjonali li jirregolaw il-parteċipazzjoni tagħhom fis-seduta mill-bogħod u li ma humiex koperti mir-Regolament dwar il-Ġustizzja elettronika ((UE) 2023/2844).
a. Informazzjoni dwar il-liġi u l-proċeduri nazzjonali applikabbli (inklużi d-drittijiet u s-salvagwardji proċedurali) għall-organizzazzjoni ta’ seduta jew intervista permezz ta’ vidjokonferenza jew teknoloġija oħra
Ir-regoli dwar l-użu tal-vidjokonferenzi meta jiġu pproċessati kawżi kriminali b’mod diġitali u dwar is-seduta diġitali jew l-intervista ta’ persuni suspettati jew xhieda huma stabbiliti fil-Kodiċi Kriminali (Wetboek van Strafrecht), fil-Kodiċi tal-Proċedura Kriminali (Wetboek van Strafvordering), u fl-Ordni dwar il-Vidjokonferenzi (Besluit videoconferentie) (wetten.overheid.nl/BWBR0019836/2022-11-25/0). L-Ordni dwar il-Vidjokonferenzi jispeċifika ċ-ċirkostanzi u s-salvagwardji li jridu japplikaw bħala kundizzjoni għall-użu tal-vidjokonferenzi f’kawżi kriminali jew fi proċedimenti ta’ appell kontra miżura ta’ kustodja, kif imsemmi fit-Taqsimiet 94 u 96 tal-Att dwar il-Persuni Barranin tal-2000 (Vreemdelingenwet 2000). Il-vidjokonferenzi ma jintużawx, pereżempju, jekk persuna li għandha tinstema’ jkollha insuffiċjenza fis-smigħ jew fil-vista ta’ tali natura li l-vidjokonferenzi jkunu ta’ detriment għall-kontribut jew il-pożizzjoni tagħha fil-proċedimenti kriminali. L-Ordni dwar il-Vidjokonferenzi jistabbilixxi wkoll rekwiżiti tekniċi għas-sistema użata biex tiġi organizzata seduta jew intervista b’mod diġitali.
Is-software tal-vidjokonferenzi jista’ jintuża biex jinstemgħu, jiġu intervistati jew jiġu interrogati individwi. Il-President tat-tribunal, l-imħallef, l-imħallef delegat jew l-uffiċjal inkarigat mis-seduta jiddeċiedi jekk hux se jintużaw l-vidjokonferenzi.
Bħalissa qed issir ħidma fuq Kodiċi ta’ Proċedura Kriminali ġdid u huwa mistenni li jidħol fis-seħħ fl-1 ta’ April 2029. Ir-regoli relatati mal-vidjokonferenzi qed jiġu estiżi f’għadd ta’ oqsma. Żieda waħda għar-regoli hija li, minbarra s-seduta, l-intervista u l-interrogazzjoni ta’ persuna, se jkun possibbli wkoll li persuna tattendi intervista jew seduta permezz ta’ vidjokonferenzi. Dan ifisser li persuna tkun tista’ tattendi intervista jew seduta bħala osservatur, anki jekk ma tkunx qed tiġi interrogata jew intervistata. Fir-rigward tar-rekwiżit li jinkiseb il-kunsens tas-suspettat, ġiet inkluża wkoll l-istipulazzjoni li dan japplika mhux biss għal proċess quddiem diviżjoni bi tliet imħallfin, iżda għal kwalunkwe forma ta’ proċess – inkluż, għalhekk, jekk il-kawża tinstema’ minn diviżjoni b’imħallef wieħed. Fl-aħħar, il-grupp ta’ parteċipanti fil-proċedimenti li huma mitluba mill-imħallef biex jagħtu l-opinjoni tagħhom dwar l-użu tal-vidjokonferenzi ġie estiż.
b. Informazzjoni dwar ir-rekwiżiti proċedurali għall-għoti ta’ kunsens għall-użu ta’ vidjokonferenzi jew teknoloġija oħra li tippermetti l-parteċipazzjoni b’mezzi diġitali
Il-punt tat-tluq huwa – u se jkompli jkun – li l-uffiċjal jew l-imħallef li jmexxi s-seduta jkollu l-aħħar kelma dwar jekk jintużawx il-vidjokonferenzi u li, fil-prinċipju, il-vidjokonferenzi huma possibbli fis-sitwazzjonijiet kollha li jinvolvu s-seduta, l-intervista jew l-interrogazzjoni ta’ persuni bħala parti minn proċedimenti kriminali. Hemm żewġ sitwazzjonijiet li fihom il-vidjokonferenzi jistgħu jintużaw biss bil-kunsens tal-persuna suspettata: l-ewwel, jekk is-suspettat jitressaq quddiem l-imħallef delegat biex jittratta talba għal arrest preventiv u, it-tieni, jekk il-mertu tal-kawża jkun qed jinstema’ fil-qorti minn diviżjoni bi tliet imħallfin. Madankollu, il-vidjokonferenzi jistgħu jintużaw kull meta l-imħallef iqis li jkun meħtieġ f’każijiet meta, minħabba interess partikolari fl-iżgurar tas-sigurtà tas-seduta jew tat-trasport lejn u mis-seduta, ikun meħtieġ b’mod urġenti li l-persuna suspettata tidher quddiem l-imħallef delegat jew tipparteċipa fis-seduta permezz tat-teknoloġija tal-vidjokonferenzi.
c. Kif jiġi żgurat l-aċċess għall-infrastruttura meħtieġa tal-vidjokonferenzi għall-persuni suspettati, akkużati jew ikkundannati, jew għall-persuni affettwati, inklużi l-persuni b’diżabilità?
Biex jiġi żgurat l-aċċess għall-infrastruttura tal-vidjokonferenzi, kważi l-qrati kollha fin-Netherlands huma mgħammra b’faċilitajiet li jippermettu seduti online, u għadd ta’ kmamar u awli tal-qorti fl-istituzzjonijiet penali għandhom faċilitajiet li jippermettu lin-nies jipparteċipaw f’seduti u/jew intervisti b’mezzi diġitali.
Seduta jew intervista online jistgħu jiġu organizzati permezz ta’ Microsoft Teams jew Cisco Meeting Server (CMS). Il-qorti tiddetermina liema software ta’ vidjokonferenzi jintuża, u l-gwidi dwar l-użu ta’ Teams u CMS huma disponibbli fuq is-sit web tal-Kunsill għall-Ġudikatura (Raad voor de Rechtspraak).
Bħalissa, il-ġudikatura Netherlandiża ma għandha l-ebda faċilità integrata speċifika għall-parteċipanti b’diżabilità. Fi proċedura attwali ta’ sejħa għall-offerti relatata ma’ soluzzjoni ġdida għal seduti online, l-aċċessibbiltà ġiet inkluża fil-pakkett ta’ rekwiżiti.
d. Kif tiġi żgurata l-kunfidenzjalità tal-komunikazzjoni bejn persuna suspettata, akkużata jew ikkundannata, jew persuna affettwata u l-avukat tagħha qabel u matul is-seduta?
Kundizzjoni għal seduta mill-bogħod hija li l-partijiet fil-proċedimenti u l-avukat jew ir-rappreżentant awtorizzat tagħhom iridu jkunu jistgħu jikkomunikaw ma’ xulxin b’mod kunfidenzjali matul is-seduta. Bħalissa qed tiġi żviluppata pjattaforma ta’ vidjokonferenzi li se tippermetti lill-avukat u lill-persuna li tinstema’ jikkonferixxu b’mod kunfidenzjali f’kamra diġitali separata. Sakemm dan is-software ġdid ikun lest, qed jittieħdu miżuri prattiċi, bħall-konsultazzjoni f’kamra fiżika separata u/jew bit-telefown.
e. X’inhuma r-rimedji disponibbli skont il-liġi nazzjonali li persuna suspettata, akkużata jew ikkundannata, jew persuna affettwata tista’ tfittex fil-każ ta’ ksur tar-rekwiżiti jew tal-garanziji previsti fl-Artikolu 6 tar-Regolament (UE) 2023/2844?
F’dak li għandu x’jaqsam mal-użu tal-vidjokonferenzi, ir-Regolament dwar il-Ġustizzja elettronika jirreferi għal sitt atti legali Ewropej, li ġew implimentati f’diversi atti legali u jinvolvu proċeduri differenti. Jekk ikun meħtieġ, in-nuqqas ta’ konformità mal-garanziji previsti fl-Artikolu 6 tar-Regolament dwar il-Ġustizzja elettronika jista’ jinġieb għall-attenzjoni tal-imħallef, jekk l-imħallef ikollu wkoll rwol fil-proċedura. Jekk ma tkun saret l-ebda dispożizzjoni għall-involviment ta’ mħallef jew il-proċess legali jinkorpora garanziji insuffiċjenti, fin-Netherlands dejjem hemm il-possibbiltà li l-kwistjoni titressaq quddiem il-qrati ċivili (kemm jekk fil-forma ta’ proċedimenti interlokutorji jew mod ieħor), li jistgħu jivvalutaw jekk kienx hemm att illegali minħabba nuqqas ta’ konformità mal-Artikolu 6.
f. Kif jiġu infurmati r-rappreżentanti legali dwar seduta jew intervista online ta’ minorenni? How is the best interest of the child taken into account?
Il-Kodiċi tal-Proċedura Kriminali fih regolamenti supplimentari fir-rigward taż-żgħażagħ (ara l-Artikolu 486 et seq.).
g. Il-liġi nazzjonali tippermetti li jsiru reġistrazzjonijiet ta’ seduta jew intervista online?
Il-Kodiċi tal-Proċedura Kriminali l-ġdid u l-Att dwar l-Innovazzjoni fil-Proċedura Kriminali (Innovatiewet Strafvordering) jinkludu regoli dwar ir-reġistrazzjoni tas-seduti. Dan l-aħħar, testijiet piloti ġew ikkompletati biex jittestjaw id-dispożizzjonijiet, li matulhom ġew irreġistrati s-seduti u tfassal rekord fil-qosor. Fil-prattika, dan ma wassal għall-ebda titjib fil-proċedura kriminali. B’riżultat ta’ dan, qed jiġi propost li din l-għażla ma ssirx fl-Att dwar l-Innovazzjoni fil-Proċedura Kriminali. Madankollu, se jibqa’ possibbli li tiġi rreġistrata s-seduta, flimkien ma’ rekord regolari.
h. X’inhuma l-arranġamenti prattiċi għal seduta jew intervista online? Liema awtorità tista’ tiġi kkuntattjata? Hemm xi rekwiżiti speċjali?
Il-qorti tiddetermina jekk tippermettix seduta mill-bogħod jew parteċipazzjoni f’seduta permezz ta’ mezzi diġitali, iżda f’ċerti każijiet is-suspettat jew l-avukat tiegħu jrid jagħti l-kunsens tiegħu għal dan (ara l-punt b). L-eċċezzjonijiet għal dan id-dritt ta’ kunsens huma limitati għal każijiet fejn ikun hemm ħtieġa urġenti li ma jingħatax, minħabba l-interess partikolari li tiġi żgurata s-sigurtà tal-intervista jew tas-seduta jew tat-trasport lejn u mis-seduta. Iċ-ċitazzjoni bil-miktub mibgħuta lill-persuna li għandha tinstema’ tiddikjara jekk hux se jintużaw il-vidjokonferenzi. Din iċ-ċitazzjoni tipprovdi informazzjoni dwar kif u sa meta l-persuna li tinstema’ tista’ tindika li ma tagħtix il-kunsens tagħha għall-użu tal-vidjokonferenzi. Meta xieraq, il-prosekutur pubbliku jista’ jiġi mistoqsi wkoll jekk jagħtix il-kunsens tiegħu għall-użu tal-vidjokonferenzi.
Se tittieħed deċiżjoni u tiġi kkomunikata lill-persuna li għandha tinstema’ jew lill-avukat tagħha mhux aktar tard minn 24 siegħa qabel is-seduta mill-bogħod jew il-parteċipazzjoni f’seduta b’mezzi diġitali.
4. It-tariffi għall-proċeduri f’materji ċivili u kummerċjali
Hemm kostijiet involuti fit-tmexxija ta’ proċedimenti legali fin-Netherlands, bħall-kostijiet li jirriżultaw minn kawża li tkun qed tinstema’ minn qorti: it-tariffi tal-qorti. Avukat, rappreżentant awtorizzat jew professjonist legali ieħor jista’ wkoll jitlob tariffi. It-tariffi għal professjonisti u professjonijiet legali differenti jvarjaw minn professjonist għal ieħor. L-aħjar huwa li jsiru mistoqsijiet mal-organizzazzjoni kkonċernata dwar dawn it-tariffi. It-tariffi f’din il-paġna huma relatati mat-tariffi tal-qorti u t-tariffi tal-uffiċjali ġudizzjarji.
Tariffi tal-uffiċjali ġudizzjarji
F’materji ċivili, il-proċedimenti jistgħu jinbdew permezz ta’ rikors, iżda ta’ spiss jinbdew permezz ta’ ċitazzjoni. It-tariffa għal dan hija ta’ EUR 112.37 għal kreditur li ma huwiex soġġett għall-VAT u ta’ EUR 135.97 għal kreditur li huwa persuna fiżika. Jista’ jingħata wkoll suppliment għal tali tariffi. Dan japplika għall-kawżi ta’ divorzju, għall-kostijiet tan-notifika u għall-kostijiet tas-sekwestri. Rati oħra għal atti uffiċjali mwettqa minn uffiċjali ġudizzjarji jistgħu jinstabu fl-Ordni dwar it-Tariffi tal-Uffiċjali Ġudizzjarji (Besluit tarieven ambtshandelingen gerechtsdeurwaarders).
Tariffi tal-qorti
Ir-rati applikabbli jinsabu fit-tabella ta’ hawn taħt. Dawn ir-rati huma indiċjati kull sena u huma stabbiliti fl-anness tal-Att dwar it-Tariffi tal-Qorti fil-Kawżi Ċivili (Wet griffierechten burgerlijke zaken).
| Natura/ammont tal-pretensjoni jew tar-rikors | Tariffa tal-qorti għal persuni mhux fiżiċi | Tariffa tal-qorti għal persuni fiżiċi | Tariffa tal-qorti għal persuni b’mezzi limitati |
| Tariffi tal-qorti għal kawżi subdistrettwali ttrattati fil-qorti | |||
|
Kawżi relatati ma’ pretensjoni jew rikors:
|
EUR 130 | EUR 87 | EUR 87 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 500 iżda li ma jaqbiżx l-EUR 1,500 | EUR 328 | EUR 218 | EUR 87 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 1,500 iżda li ma jaqbiżx l-EUR 2,500 | EUR 372 | EUR 248 | EUR 87 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 2,500 iżda li ma jaqbiżx l-EUR 5,000 | EUR 496 | EUR 248 | EUR 87 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 5,000 iżda li ma jaqbiżx l-EUR 12,500 | EUR 524 | EUR 248 | EUR 87 |
| Kawżi relatati ma’ pretensjoni jew rikors li jinvolvu ammont ta’ aktar minn EUR 12,500 | EUR 1,409 | EUR 706 | EUR 87 |
| Tariffi tal-qorti għal kawżi oħra, mhux subdistrettwali, ittrattati fil-qorti | |||
| Kawżi kif imsemmija fl-ewwel sentenza tal-Artikolu 32a(1) tal-Kodiċi tal-Proċedura Ċivili (Wetboek van Burgerlijke Rechtsvordering – Rv) | EUR 18,287 | EUR 18,287 | mhux applikabbli |
|
Kawżi kif imsemmija fl-Artikolu 32a(3) Rv: |
EUR 9,143 | EUR 9,143 | mhux applikabbli |
| Kawżi relatati ma’ pretensjoni jew rikors ta’ ammont indeterminat | EUR 688 | EUR 320 | EUR 87 |
| Kawżi relatati ma’ pretensjoni jew rikors li jinvolvu ammont li ma jaqbiżx l-EUR 100,000 | EUR 2,889 | EUR 1,325 | EUR 87 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 100,000 iżda li ma jaqbiżx l-EUR 1,000,000 | EUR 6,617 | EUR 2,626 | EUR 87 |
| Kawżi relatati ma’ pretensjoni jew rikors li jinvolvu ammont ta’ aktar minn EUR 1,000,000 | EUR 9,825 | EUR 2,626 | EUR 87 |
| Tariffa tal-qorti tal-qrati tal-appell | |||
| Kawżi kif imsemmija fl-ewwel sentenza tal-Artikolu 32a(1) Rv u t-tieni sentenza tal-Artikolu 1064a(1) Rv | EUR 24,382 | EUR 24,382 | mhux applikabbli |
|
Kawżi kif imsemmija fl-Artikolu 32a(3) Rv: |
EUR 12,191 | EUR 12,191 | mhux applikabbli |
|
Kawżi relatati ma’ pretensjoni jew rikors:
|
EUR 798 | EUR 349 | EUR 349 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 12,500 iżda li ma jaqbiżx l-EUR 100,000 | EUR 2,175 | EUR 798 | EUR 349 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 100,000 iżda li ma jaqbiżx l-EUR 1,000,000 | EUR 6,561 | EUR 2,053 | EUR 349 |
| Kawżi relatati ma’ pretensjoni jew rikors li jinvolvu ammont ta’ aktar minn EUR 1,000,000 | EUR 13,124 | EUR 2,053 | EUR 349 |
| Tariffa tal-qorti tal-Qorti Suprema | |||
|
Kawżi relatati ma’ pretensjoni jew rikors:
|
EUR 873 | EUR 361 | EUR 361 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 12,500 iżda li ma jaqbiżx l-EUR 100,000 | EUR 2,897 | EUR 873 | EUR 361 |
| Kawżi relatati ma’ pretensjoni jew rikors li jinvolvu ammont li jaqbeż l-EUR 100,000 iżda li ma jaqbiżx l-EUR 1,000,000 | EUR 8,206 | EUR 2,463 | EUR 361 |
| Kawżi relatati ma’ pretensjoni jew rikors li jinvolvu ammont ta’ aktar minn EUR 1,000,000 | EUR 16,410 | EUR 2,463 | EUR 361 |
Kamp ta’ applikazzjoni tat-tariffi tal-qorti
It-tariffi tal-qorti huma l-istess għall-proċedimenti ċivili kollha u għalhekk japplikaw ukoll għall-istrumenti tad-dritt ċivili li jiffurmaw parti mir-Regolament dwar il-Ġustizzja elettronika, jiġifieri:
| Proċedimenti relatati ma’: | ||
| Ordni ta’ ħlas Ewropea | (KE) 1896/2006 | |
| Pretensjonijiet żgħar | (KE) 861/2007 | |
| Ordni ta’ Preservazzjoni Ewropea | (UE) 655/2014 | |
| Ordni ta’ infurzar għal pretensjonijiet mhux kontestati | (KE) 805/2004 | |
| Proċedimenti għar-rikonoxximent, dikjarazzjoni ta’ eżegwibbiltà jew rifjut ta’ rikonoxximent: | ||
| Regolament Ewropew dwar is-Suċċessjoni | (UE) 650/2012 | |
| Brussell I | (UE) 1215/2012 | |
| Miżuri ta’ protezzjoni f’materji ċivili | (UE) 606/2013 | |
| Obbligi ta’ manteniment | (KE) 4/2009 | |
| Sistemi li jirregolaw il-beni tal-miżżewġin | (UE) 2016/1103 | |
| Konsegwenzi patrimonjali ta’ sħubijiet reġistrati | (UE) 2016/1104 | |
| Ħtif ta’ minuri | (UE) 2019/1111 | |
| Proċedimenti relatati mal-ħruġ, ir-rettifika u l-irtirar ta’: | ||
| Obbligi ta’ manteniment | (KE) 4/2009 | Estratti |
| Regolament Ewropew dwar is-Suċċessjoni | (UE) 650/2012 | Ċertifikat Ewropew tas-Suċċessjoni u attestazzjonijiet |
| Brussell I | (UE) 1215/2012 | Ċertifikati |
| Miżuri ta’ protezzjoni f’materji ċivili | (UE) 606/2013 | Ċertifikati |
| Sistemi li jirregolaw il-beni tal-miżżewġin | (UE) 2016/1103 | Attestazzjonijiet |
| Konsegwenzi patrimonjali ta’ sħubijiet reġistrati | (UE) 2016/1104 | Attestazzjonijiet |
| Ħtif ta’ minuri | (UE) 2019/1111 | Ċertifikati |
| Sottomissjoni ta’ pretensjoni minn kreditur barrani fi proċedimenti ta’ insolvenza skont l-Artikolu 53 | ||
| Proċedimenti ta’ insolvenza | (UE) 2015/848 | |
| Komunikazzjoni bejn persuni fiżiċi jew ġuridiċi jew ir-rappreżentanti tagħhom u l-awtoritajiet ċentrali: | ||
| Obbligi ta’ manteniment | (KE) 4/2009 | |
| Ħtif ta’ minuri | (UE) 2019/1111 | |
| Regoli minimi komuni relatati mal-għajnuna legali | Id-Direttiva 2002/8/KE | |
5. Metodi ta’ pagament elettroniku
Għall-gruppi professjonali kollha skont il-liġi ċivili li għandhom rwol f’wieħed mill-istrumenti legali li jiffurmaw parti mir-Regolament dwar il-Ġustizzja elettronika, huma biss il-metodi ta’ pagament elettroniku li huma disponibbli li jidhru fit-tabella ta’ hawn taħt. Jekk metodu ta’ pagament elettroniku ma jkunx jidher, ma jkunx possibbli li jsir pagament b’dan il-mod. Diversi organizzazzjonijiet jaċċettaw ukoll pagament fi flus kontanti. Jekk tixtieq aktar informazzjoni dwar metodi ta’ pagament mhux elettroniċi jew jekk għandek xi mistoqsijiet dwar il-metodi ta’ pagament elettroniku, l-aħjar huwa li tikkuntattja lill-organizzazzjoni direttament.
| Organizzazzjoni | Metodu ta’ pagament elettroniku |
| Nutara | Il-metodi ta’ pagament elettroniku jistgħu jvarjaw minn nutar għal ieħor. Ikkuntattja lin-nutar tiegħek għall-informazzjoni. |
| Uffiċjali ġudizzjarji | Il-metodi ta’ pagament elettroniku jistgħu jvarjaw minn uffiċjal ġudizzjarju għal ieħor. Ikkuntattja lill-uffiċjal ġudizzjarju tiegħek għall-informazzjoni. |
| Il-ġudikatura Netherlandiża |
|
| Il-Kunsill tal-Istat | L-għażliet ta’ pagament se jiġu inklużi fil-konferma tal-wasla tal-appell tiegħek. |
| Il-Qorti Suprema | It-trasferiment online; numru tal-kont dejjem jingħata fuq il-fatturi tal-Qorti Suprema. In-numru tal-fattura jrid jiġi kkwotat. Il-fatturi dejjem jintbagħtu bil-posta. |
| L-Aġenzija Ċentrali tal-Ġbir Ġudizzjarju |
|
| Bord tal-Għajnuna Legali (Raad voor Rechtsbijstand) |
|
| Avukati | Il-metodi ta’ pagament elettroniku jistgħu jvarjaw minn avukat għal ieħor. Ikkuntattja lill-avukat tiegħek għall-informazzjoni. |
| Amministrazzjoni, kustodja u kurazija | Il-metodi ta’ pagament elettroniku jistgħu jvarjaw minn amministratur, kustodju u kuratur għal ieħor. Ikkuntattja l-amministratur, il-kustodju jew il-kuratur tiegħek għall-informazzjoni. |
6. Notifika dwar l-użu bikri tas-sistema tal-IT deċentralizzata
Id-dati stabbiliti fir-Regolament dwar il-Ġustizzja elettronika ((UE) 2023/2844, l-Artikolu 10(3) u l-Artikolu 26(3)) għad-dħul fl-użu tas-sistema tal-IT deċentralizzata huma kif ġej għal-lottijiet rispettivi:
- Id-dħul fl-użu tal-lott 1 sas-17 ta’ Jannar 2028;
- Id-dħul fl-użu tal-lott 2 sas-17 ta’ Jannar 2029;
- Id-dħul fl-użu tal-lott 3 sas-17 ta’ Jannar 2030;
- Id-dħul fl-użu tal-lott 4 sas-17 ta’ Jannar 2031.
Is-sistema tal-IT deċentralizzata mhux se tibda tintuża qabel id-dati stabbiliti fl-Artikolu 26(3) tar-Regolament dwar il-Ġustizzja elettronika ((UE) 2023/2844) għal kwalunkwe wieħed mill-erba’ lottijiet inklużi fl-Artikolu 10(3) ta’ dak ir-Regolament. Jekk madankollu jkun possibbli d-dħul bikri fl-użu, tiġi pprovduta indikazzjoni, għal kull strument u organizzazzjoni legali, ta’ meta dan jista’ jinkiseb.
7. Notifika dwar l-użu bikri ta’ vidjokonferenzi f’materji ċivili u kummerċjali
Fil-preżent, mhux se jkun possibbli li jintużaw vidjokonferenzi f’materji ċivili u kummerċjali qabel l-1 ta’ Mejju 2025 għal strumenti legali li jiffurmaw parti mir-Regolament dwar il-Ġustizzja elettronika (Regolament (UE) 2023/2844), f’konformità mal-Artikolu 5 tiegħu.
8. Notifika dwar l-użu bikri ta’ vidjokonferenzi f’materji kriminali
Fil-preżent, mhux se jkun possibbli li jintużaw vidjokonferenzi f’materji kriminali qabel l-1 ta’ Mejju 2025 għal strumenti legali li jiffurmaw parti mir-Regolament dwar il-Ġustizzja elettronika (Regolament (UE) 2023/2844), f’konformità mal-Artikolu 6 tiegħu.